Хириясул ГІалибег (1805–5 июл, 1839) — аваразул рагъул цевехъан, Имам Шамилил наиб ва гьесдаса цере рукІарал кІиявго имамасул цадахъчи, Аваристаналъул наиб.
Хириясул ГӀалибек | |
---|---|
Эмен | Хириясулав |
Эбел | Бегичу |
Лъимал | Ханзадая |
Дин | Ислам |
Рагъал | АхІулгохІ цІуни/Кавказалъул рагъ 1817–1864 |
ГІалибек гьавуна 1805 соналъ рагъухъабазул хъизаналда, Аваристаналъул тахшагьаралда. Гьесул эмен Хириясулав ва кІудияв эмен Чупан рукІана КІудияв ГІумаханил ханлъиялъул заманалда Аваристаналъул аскаразул церехъабилъун. Рагъ хІалуцинегІан ГІалибег хІалтІулев вукІана ГІочІло росдал къадилъун, хадув гьев тІамуна Рихьуни росдал къадилъун. Кавказалда эркенлъи цІуниялъул рагъ байбихьидал, ГІалибекица цин ккуна ГъазимухІамадил рахъ, гьев хведал, ХІамзат-бекил рахъги. 1834 соналъ Шамил имамлъун вищидал, ГІалибег Шамилица тІамуна хунздерил наиблъун ва гьесда тІадкъана цо хунздерил боялъе бетІерлъи гьаби.
ГІалибекица бахІарчилъи бихьизабуна генерал Фезил Авар экспедициялда, гьесул рагъухъабаз нахъчІвана гІурусазул Аргъвани тІаде кІанцІи, гІахьаллъи гьабуна ГІашилтІа рукІарал рагъазулъ.
1839 соналъ Шамил сверун ккун вукІана АхІулгохІда. ГІалибек тун вукІана Сурхайил си цІуние. Гьеб букІана рагъулъ аслияб щулалъи, щай абуни гьеб букІана бищун борхатаб бакІалда. Гьелъ, АхІулгохІ цІунулезда кІолеб букІана гІурусазул аскарал ругелщинал бакІазде тІаде гулла базе.
29 июналъ, сагІат ичІгоялда, Апшерон ва Кураялъул полказул батальонал лъабабго рахъалъ тІаде къана ва байбихьана си бахъизе. МагІарулаз гьезул кьаби нахъчІвана, гІурус боял нахъе къана ва байбихьана сиялде гІарадабазул гулла базе. Гьениб гуллица ГІалибегил гъеж тІезабуна, амма, гьелъухъ балагьичІого, гьев вагъулев вукІана.
ГІалибек щварал ругънадасан хола 5 июлалъ, кІиго къоялдасан бахъула Сурхайил си, гьеб цунун рукІаралщинал топханадул гуллида гъоркь хун хадуб. Гьеб щулалъи бахъиялъ тІолго рагъалъул ахир баян гьабула, жеги лъабгогІанасеб моцІидасан АхІулгохІги бахъула (22 август, 1839 сон). Гьенивго, си цІунун рукІаразда цадахъ вукъула ГІалибегги.
This article uses material from the Wikipedia Авар article Хириясул ГӀалибек, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Контент рагьараб буго CC BY-SA 4.0 лицензиялда гъоркь, цогидаб бихьизабун гьечӀони. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Авар (DUHOCTRUNGQUOC.VN) is an independent company and has no affiliation with Wiki Foundation.