মৃণাল কলিতা

অসমৰ কামৰূপ(গ্ৰাম্য) জিলাৰ বামুন্দিত মৃণাল কলিতাৰ জন্ম হৈছিল। পিতৃ ধীৰেন্দ্ৰ চন্দ্ৰ কলিতা আৰু মাতৃ কুসুম কলিতা। মৃণাল কলিতা এজন কৃতী ছাত্ৰ আছিল। তেওঁ হাইস্কুল শিক্ষান্ত পৰীক্ষাত অসমৰ ভিতৰত প্ৰথম আৰু উচ্চতৰ মাধ্যমিক বিজ্ঞান শাখাত পঞ্চম স্থান লাভ কৰি উৰ্ত্তীণ হৈছিল। স্নাতক পৰীক্ষাত, গণিত বিষয়ত কটন কলেজৰপৰা তেওঁ প্ৰথম স্থান লাভ কৰি বছৰটোৰ শ্ৰেষ্ঠ স্নাতকৰ সম্মান লাভ কৰিছিল। সমান্তৰালভাৱে কটন মহাবিদ্যালয় সপ্তাহ আৰু গুৱাহাটী বিশ্ববিদ্যালয় সপ্তাহত তেওঁ শ্ৰেষ্ঠ সাহিত্যিকৰ সম্মানো লাভ কৰিছিল।

মৃণাল কলিতা পেছাত এগৰাকী অধ্যাপক। তেওঁ গুৱাহাটীৰ পাণ্ডু মহাবিদ্যালয়ৰ গণিত বিভাগৰ অধ্যাপক ৰূপে কৰ্মৰত। ছাত্ৰাৱস্থাৰেপৰা সাহিত্য চৰ্চা কৰি অহা কলিতা মূলতঃ গল্পকাৰ ৰূপে পৰিচিত। সৰল ভাষা আৰু বিষয়-বস্তুৰ বৈচিত্ৰ্য় কলিতাৰ গল্পৰ বৈশিষ্ট্য। অনুশীলন, অযান্ত্ৰিক অনুশীলন, মৃত্যুৰ সিপাৰে কলিতাৰ গল্প-সংকলন। কলিতাৰ গল্প বঙালী, উড়িয়া আৰু ইংৰাজী ভাষালৈ অনূদিত হৈছে। তেখেতৰ 'বকুল ফুলৰ দৰে' বহুপঠিত উপন্যাসখন বৰ্তমানলৈকে সোতৰটা সংস্কৰণ প্ৰকাশ পাইছে। গ্ৰন্থ আকাৰে প্ৰকাশৰ আগেয়ে উপন্যাসখন বাৰ ওঠৰ নামৰ কিশোৰ-কিশোৰীৰ বাবে প্ৰকাশিত আলোচনীখন ধাৰাবাহিক ৰূপে প্ৰকাশ হৈ আছিল। অসমৰ বিভিন্ন কাকত-আলোচনীৰ স্তম্ভ-লেখক ৰূপে কলিতাৰ যথেষ্ট সংখ্যক নিৱন্ধ আৰু আত্ম-জীৱনীমূলক ৰচনা প্ৰকাশ পাইছে। এই ৰচনা আৰু নিৱন্ধসমূহৰ একত্ৰিত সংকলন 'গডফাদাৰৰ হাত আৰু চয়তানৰ মগজু' আৰু 'অকপটে'। জীয়ৰী ৰিবৰিবক লৈ কলিতাই 'ৰিবৰিব মুনমীহঁতৰ শেষ নোহোৱা কাহিনী' নাম দি এটি কাহিনী সংকলন শিশুসকলৰ বাবে লিখি উলিয়াইছে ।

1. অনুশীলন (গল্প সংকলন)
2. অযান্ত্ৰিক অনুশীলন (গল্প সংকলন)
3. মৃত্যুৰ সিপাৰে (গল্প সংকলন)
4. বকুল ফুলৰ দৰে (উপন্যাস)
5. ৰিবৰিব মুনমীহঁতৰ শেষ নোহোৱা কাহিনী (শিশুৰ বাবে কাহিনীৰ সংকলন)
6. গণিতৰ বৰ্ণিল জগত ( গণিত বিষয়ক পুথি) (ড° জোনালী চৌধুৰীৰ সৈতে একেলগে)
7. গডফাদাৰৰ হাত আৰু চয়তানৰ মগজু (ভিন্নধৰ্মী ৰচনা সংকলন)
8. অকপটে (প্ৰৱন্ধ সংকলন)

২০১১ চনত, কলিতাই সাহিত্য অকাডেমি ৰ আমন্ত্ৰণ ক্ৰমে কেৰালা সাহিত্য অকাডেমিৰ প্ৰেক্ষাগৃহত 'মাই ৱৰ্ল্ড মাই ৰাইটিং' শীৰ্ষক বক্তৃতা প্ৰদান কৰিছিল। ২০২১ চনত জুলাইত কমনৱেল্থ ফাউেণ্ডশ্যনৰ কমনৱেল্থ ৰাইটাৰচ্ নামৰ অনুষ্ঠানটোৰ আলোচনী ‘Adda’ত তেখেতৰ ‘অযান্ত্ৰিক’ নামৰ গল্পটোৰ পল্লৱী কোঁৱৰে কৰা অনুবাদ ‘Not a Machine’ প্ৰকাশ হৈছে৷ কলিতাৰ গল্প অসম ৰাজ্যিক শিক্ষা পৰিষদৰ পাঠ্যক্ৰমৰ অন্তৰ্গত হৈছে আৰু তেওঁৰ গণিত বিষয়ক গৱেষণা পত্ৰ ভাৰত, আমেৰিকা, নেদাৰলেণ্ড আৰু বুলগেৰিয়াৰ ৰিচাৰ্ছ জাণালত প্ৰকাশ পাইছে। ২০২১ চনৰ ডিচেম্বৰ মাহৰ ৩০ তাৰিখে ‘বকুল ফুলৰ দৰে’ গ্ৰন্থৰ বাবে সাহিত্য অকাডেমিৰ ‘শিশু সাহিত্য বঁটা’ লাভ কৰে।