متلية

كميول جنسي، لمتلية كتعرف بالانجداب بالمشاعر و/ولا جنسيا بطريقة دايمة، ماشي عرضية ؤلا مؤقتة، ل ناس لي من نفس لجنس.

لمتلية كتمتل مع لمغايرة و ليزديواجية الجنسية، توجهات لجنسية لمهمة. لعلماء مزال ما عرفوش بضبط شنو لي كيسبب ميول جنسي، ولكن كيقولو بلي هدشي عندو علاقة ببزاف ديال لحوايج مع بعضهم: لجينات، لهورمونات وتأتير ديال لمحيط ديال كل واحد، وما كا يشوفوش لميول لجنسي كا ختيار. واخا ما كاين حتى دراسة على شنو كيسبب لميول لجنسي لي مقبولة من بزاف، لعلماء كيفضلو نضريات لي مبنية على لبيولوجيا. وكاين أدلة كترعلى تأتير لعوامل لي بيولوجية وماشي جتيماعية على لميول لجنسي، خصوصا عند رجال. ومن جهة خرا ما كاينش أدلة كافية على تأتير لعلاقة مع لوليدين ولا تجارب ديال صغر على لميول لجنسي. واخا كاين ناس كيعتابرو لمتلية شي حاجة ماشي طبيعية، لبحوت لعلمية كتبين بلي لمتلية تغير عادي وطبيعي د لميول لجنسي د بنادم، وبللي لمتلية ف حد داتها ما عندهاش تأتير سلبي پسيكولوجي على شخص لمتلي. وواخا كاينين علاجات پسيكولجية باش لواحد يغير لميول ديالو، لجدوا ديالهم ما متبوتاش علميا.

الناس لمتليين كيتلقبو ببزاف ديال لمصطلحات. مصطلح ݣاي gay ل راجل و ليزبيانة ل بنت هما لي متداولين بزاف، واخا ݣاي تقدر تستعمل للبنات حتى هما. صعيب بزاف تقدير شحال كاين ديال لمتليين، ولا شحال د ناس ف علاقة حب مع شخص من نفس لجنس ولا شحال د ناس فايت دارو سكس مع شخص من نفس لجنس، خصوصا كاين بزاف ديال لمتليين كيخبيو ميولهم لجنسي حيت كيخافو يجبد عليهم لحݣرة ولا تمييز وحتى رفض من محيطهم ولا شي تصرف عنيف من ناس خرين إلا عرفو. ومن لفوق، لمتلية كيعاقب عليها لقانون ف بزاف ديال دول. ولمتلية كاينة حتى ف لحيوانات.

بزاف ديال لمتليين كيعيشو ف علاقة متلية معقولة، واخا حتى لعشر سنين لي فاتت عاد ولا شوية ممكن هاد ضاهرة تقدر، وضروف سياسية خلات بعض منهم يعلن لمتلية ديالو. هاد لعلاقات بحالهم بحال لعلاقات لمغايرة ف لجوانب لپسيكولوجية. ولعلاقات لمتلية كتجبد يا لإعجاب يا رفض وسبان، على حساب تقافة فين كتكون. من لخر ديال لقرن 19، بدات حركة باش لمتليين يعيشو لمتلية ديالهم بحرية ومساواة، ويكونو متلا لبراهش لمتليين محميين من ضسارة ولعنف ف لمدرسة، ويكون عند لمتليين لحق يدخلو للعسكر، ولحق يتجوجو، وتبناو ويكونو وليدين.