أضولف هيطلر (بلألمانية: Adolf Hitler) (تولد ف 20 أبريل 1889 ف براوناو آم إين - نتاحر ف 30 أبريل 1945 ف برلين) كان سياسي ألماني و لقايد ولمؤسس ديال لحزب د لعمًال لألماني ليشتيراكي، اللي معروف تا بسميت لحزب النازي. هيطلر حكم ألمانيا ما بين 1933 و 1945 وكانت لمناصب ديالو هي مستشار الدولة (1933 - 1945) و لقايد (فورر، لألمانية: Führer، مابين 1934 و 1945). ختارتو لمجلة ديال التايم واحد ما بين 100 د الناس اللي خلاو أكبر أثر فالتاريخ د بنادم فلقرن لعشرين.
شارك هيطلر مع ألمانيا فلحرب لعالمية اللًولا وخدا عليها أوسمة. ف 1920 دخل للحزب النًازي و ولاً الشاف ديالو ف 1921. ف 1923 دار محاولة د لينقيلاب اللي مانجحاتش ودخل موراها للحبس. مورا ما خرج من لحبس لقا راسو ولاً معروف و بزاف د الناس تيشجعوه وتاتعجبهم لأفكار ديالو.
ف 1933، ربح هيطلر لينتيخابات و ولاً لمستشار د ألمانيا و دار سياسة شمولية ودكتاتورية وفاشية. ف 1939، هاجمات ألمانيا اللي حاكمها هيطلر على پًولونيا، وبدات لحرب لعالمية التانية. فاللول د لحرب، حتلات ألمانيا تقريبا أوروپا كاملة و بزاف د لأراضي فإفريقيا و آسيا، و التلت د لأراضي د ليتيحاد السوڤياتي. ولكن الدول د لحلفاء أترجع و هي اللي أتربح لحرب. من مورا ما خسرات ألمانيا لحرب، نتاحر هيطلر ومراتو نهار 30 أبريل 1945 وتحرقات لجتة ديالو فبرلين.
لأغلبية د الناس فلعالم تيعتابرو هيطلر و داكشي اللي دار خايبين وماشي أخلاقيين. تيتعتابر واحد من اللي تسببو فلموت د عدد كبير د الناس مدنيين و عسكر فلوقت د لحرب لعالمية التانية.
تقدر تزيد شوف بزاف د تّصاور و لمعلومات ديال Adolf Hitler ف ويكيميديا كومنز. |
هادي زريعة ديال مقالة خاصها تّوسع. تقدر تشارك ف لكتبة ديالها. |
This article uses material from the Wikipedia داريجة article أضولف هيطلر, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). المحتوى متاح وفق CC BY-SA 4.0 ما لم يرد خلاف ذلك. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki داريجة (DUHOCTRUNGQUOC.VN) is an independent company and has no affiliation with Wiki Foundation.