O Lenlen A Kimad No Sakizata Finacadan

Nikawrira, orasaka manga’ay ko pilitod, awaay lalood, rihaday to mihecahecaan, kadofah to, malipahak to ko ’orip to romi’ami’ad, nanoyaan sato miasimaanay matoka to ko ’orip no finacadan itiya, mapawan to ko kalalokan atayal, kasasidipodipotan no niyaro’.

Caay to kainaneng ko lingad a maomah paloma, awaay to kasaniyaro’ no tamdaw, caay to kasasidama, o a iraira aca ko lalitodan to pafali no paraparatan saan, mapalasawad to ko kangodo to to’as a pacakat a mito’ong, pasiikor sa to ’a’ilocan palasawad to nano painian no awaatay ma’araw a kawas.

Malata’ang caay ka limela to painaan no awaatay ma’araw a kawas, saka marketer to ko kawas, nanoya pakinali sato ko pitefoc no kawas to tomdamdaw no Sakizaya a finacadan. Nanoya, miteka to mafodo’ to ko kakarayan, caay paterep ko fodo’, manaop to no nanom ko paniyaro’an, manaop to ko sera, adihay ko mapatayay a tamdaw.

Ira ko dangyaay a kakitaan no niyaro’, ’ayaw no kanaop no nanom, keriden ningra ko finawlan no niyaro’ a pasitakaraway a lotok milaliw, o roma a niyaro’ a tamdaw ato itiniay i dafdaf niyaro’ micamolay to roma finacadan ma’emin to a mapatay, dengan to caayay kapapina a tamdaw ko itiraay i Kilaya a lotok ko caayay kapatay.

Talacowa, caay paterep ko ’orad, nikawrira caay ho kanaop no lenlen ko Kilaya a lotok, itiya i, lasawad sato ko katalawan no alemeday a tamdaw itira i Kilaya, o nika dangya no kakitaan ko nian saka itira to i fa’elohay a sera ko pitekaan a masasidipot ato maomah paloma itiya. Nikawrira, matiniay a ka’orip i caay ka halafin, marangisay a lenlen sahacecay sato malenlen, mata’elif ko pinapina romi’ad, nengneng han to ko lotok no Kilaya o mamanaop to no nanom. Ano caay paterep ko ka’orad, o amanaop to no lenlen, o tatalacowa to ko tamdaw, o Sakizaya a finacadan o lasawad to.

Katalawan a patay o mamaledef to i Kilaya lotok, rarawraw to ko finawlan itiya, o kakitaan no niyaro’ mihima to matalaway a finawlan, nikawrira, ira ko pina a tamdaw to caayay pakahadidi to mamapatay to, ato katalawan a lifong madadengadenga i niyaro’. Matosasowalen o mamitekop ko kakarayan no tamdaw, o mamarawraw maapa ko tamdaw.

Sasini’ada sa to ko kakitaan no niyaro’ to kamatini no finacadan, mararom cingra, nanoya paini cingra to pisawad no tamdaw to pisaca’oca’ocay ato pipa’orip a demak. Itiya sato, keriden no kakitaan ko mato’asay ato finawlan misatapang a pacakat to ta’ong i awaayay ma’araw a kawas, nanoya sapater sato ko kararawraw no finawlan, malacecay pacakat to ta’ong mingitangit to pihepol no kawas, mangalay to cangra i tood no ’orip pacakat, mipaini i teloc malamatayalay to no kawas.

Masaromi’ad to dadaya ko pipacakatan, itiya o cikawasay paini to pa’araw no awaayay ma’araw a kawas, ano o nga’ayay ko sapacakat ato fa’inayan fafahiyan a sapacakat i, paterep o ko lenlen saan. O kakitaan no niyaro’ papipatala to nga’ayay a sapacakat, mikilim to tingdahay a fa’inayan fafahiyan to tireng a sapacakat, palakapoten pateli i kimoloay safitay, paskayni i pipacakat i, o cikawasay ko micekerohay cangraan patayra i nanom. Saan oya nipacakatan a sapato’aya ato tingdahay a fa’inayan fafahiyan mapatalahekal no tapelik caira, faheka ko ’alomanay to nia demak, caay ka fana’ samaanen ko matiniay, caay kafana’ to o papaakaten ko ya tingdahay fa’inayan fafahiyan, o laliyawen micekero patayra i nanom.

Itiya sa’inga’ing sato koya cakawasay, sowal sa: “mato’asen to mihecaan ko kawas cangraan matiya, caay pihayda atiya.” Nanoya, mikilim haca ko kakitaan to kaemangay ho a patingdahay, nikawrira, matiya to caay pihayda ko kawas. Maketer ko kawas to nipipacakatan, fahal sa macakat ko nanom, caay pakalaliw ko ’alomanay tamdaw a cimapatayay.

Maorat ko kakitaan no niyaro’ to nian, matalaw ko cikawasay, awaay to ko sasowalen. Nasamatira, caay to ko kakilifen no cikawasay saka pasowal han to ningra ko kakitaan, mangalay ko kawas to limecedan a fafahiyan ato someletay a fa’inayan saan, nikawrira, o makapahay limecedan a fafahiyan dengan to o wawa no kakitaan, dengan to o wawa no kakitaan ko papa’orip to finawlan a tingdahay masamatira.

Pakatengil ko kakitaan no niyaro’ to nian a ratoh i, o kakitaan ato finawlan terep sa misahiraterateng to nian a demak, nawhani o nia wawa no kakitaan o wawa no niyaro’ a sanay no finawlan, o kahemekan kaolahan a wawa i, o tariktikay a wawa i saan ko finawlan a limelaen. Itini i niyaro’, matiya o makapahay a adipangpang ko nia wawa i, o painiay to sakalipahak no niyaro’.

Ano matira i, salimela sa malo sapatingdah to sapacakat i kawas, nengneng han o mamatekop to ko finacadan, awaay to limaela no kakitaan ato finawlan to nia wawa. pasayra sato i kakitaan no niyaro’ ko nengneng no ’alomanay, o sasamaaen to, nanoya ala tangitangic sato mapolong ko finawlan. Macakat to ko nanom, lanok sato tayra i pifitayan koya wawa a macakat, ira ko cecay mitingdahay a kapah itatihi nira. satatosa sato masasimetmet to kamay, miwangawang to kamay i ’alomanay.

Pacekok ko marorayay faloco’ no finawlan, misaceliceli to sapipaoripaw toya wawa, oya safitay lonok sa masolol i nanom. Miraay to koya tingdahay tatosa, nanoyaan sa paterep ko ’orad, miteka to makerah k nanom. Tomangic to ko polong no finawlan, ala mikitorotoros sa ko finawlan, o losa’, o cohel, o ’orad, o sena’ macacamol to i kararoman a makakafit malacecay. Pasi wali no riyar a minengneng, lahedaw sato, oya kaolahan a wawa o saka fangcal no tawa, ato saka tedi’ no ta’engad, manengneng ko ’a’away ikoray ’orip no Sakizaya a finacadan.

Makerah to ko lenlen, paherek to ko pades. Nai katalawan no Sakizaya finacadan madado’edo to a miliyas to Kilaya a lotok, patikol to tayra i paniyaro’an nangra, misatapang to a mimatang paloma, mirayray to teloteloc no finacadan, malacecay ko pidotoc to ’orip no Sakizaya a finacadan.

Pakimaday ci Li se-mi, aci Rotok Sayong (Sakizaya).

Milosimatay to tilid: ci Rengos Fosay.