Eermelkanal

Uf Französisch heisst s Meer La Manche, uf Bretonisch Mor Breizh und uf Kornisch Mor Bretannek. D Röömer hän nem Oceanus Britannicus gseit.

Es isch e Meeresarm, wo vom Atlantik em Ufer vom öiropäische Feschtland no goot und d Verbindig zu der Nordsee bildet. Dä Meeresdeil het e Lengi vo öppe 560 Kilometer. Im Oschte foot dr Eermelkanal bi de Stedt Dover und Calais a und im Weschte bim änglische Landvorsprung Land‘s End und bim französische Lüüchtdurm uf dr Insle Île Vierge bi Plouguerneau im Departemänt Finistère, was uf Dütsch «s Änd vom Land» heisst.

I dämm Meer ligen es bar Insle: d Isle of Wight noch bim Ufer vo Hampshire, di änglische Scilly-Insle im Weschte und di änglische Kanalinsle Guernsey, Jersey, Sark, Herm und Alderney noch vor em französische Ufer.

Grossi Hafestedt am Eermelkanal sind Southampton, Plymouth, Dover, Cherbourg am Spitz vo dr Halbinsle Cotentin, Le Havre bi dr Mündig vo dr Seine is Meer und Calais.