Rishikesh

Rishikesh litt am hailige Fluss Ganges am südliche Fuess vom Himalaya und isch en alte Pilgerort vom Hinduismus. De Ort isch binennt nochem Hrishikesha, emene Biiname vom Gott Vishnu. De modern Name werd aber au vom Sanskritwort Rishi (ṛṣi- m.) „Waise, Seher“ abglaitet.

Di vile Tempel und Aschram vo Rishikesh liget uf baidne Flussufer und weret dör e Fuessgängerbrugg verbunde. I de Oobedämmerig werd am Triveni Ghat jede Tag e Gangaarati (Vereerig vom Fluss Ganges und vo de Flussgöttin Ganga) döregfüert, hüüffig mit Prominente. Entlang vom Fluss lebet i de Wälder vill Sadhu und Sannyasin (Askete und Mönch) und z Lakshman Jhula, wo e zwaiti Fuessgängerbrugg isch, hets en Underchumpft för Wandermönch.

 

De Ort isch im Weste bikannt wore, well i de sechzger Joor d Beatles, d Beach Boys, de Donovan und anderi Musiker z Rishikesh sind goge meditiere. De John Lennon het gär e Lied mitem Titel The Happy Hrishikesh Song komponiert. Hüt gönd vill Mensche vo de ganze Welt uf Rishikesh zum Yoga lerne und de Ort het de Ruef d „Hoptstadt vom Yoga“ z sii. Z Rishikesh het au de Swami Sivananda glebt, an vo de Pioniere vom moderne Yoga.