Antigo Eigito ye la spresson que define la ceblizaçon de la Antiguidade que se zambolbiu ne l canto nordeste de l cuntinente africano, tenendo cumo frunteira la norte l Mar Mediterráneo, la oeste l deserto de la Lhíbia, la lheste l deserto de la Arábia i la sul la purmeira cachon de l riu Nilo.
La stória de l Antigo Eigito ampeça-se an cerca de 3150 a.C., altura an que se bereficou a ouneficaçon de l reinos de l Alto i de l Baixo Eigito, i tremina an 30 a.C. quando l Eigito, yá anton sob dominaçon strangeira, se trasformou nua porbíncia de l Ampério Romano, após la derrota de la rainha Cleópatra VII na Batailha de Ácio. Durante la sue lhonga stória l Eigito conhecerie trés grandes períodos marcados pula stablidade política, prosperidade eiquenómica i florecimiento artístico, antercalados por trés períodos de decadéncia. Un desses períodos de prosperidade, zeignado cumo Ampério Nuobo, correspundiu a ua era cosmopolita durante la qual l Eigito dominou, grácias a las campanhas melitares de l faraó Tutmés III, ua ária que se stendia zde Curgos (na Núbia, antre la quarta i quinta cachones de l riu Nilo) até al riu Eufrates.
La ceblizaçon eigípcia fui uas de las purmeiras grandes ceblizaçones de la Houmanidade i mantubo durante la sue eisisténcia ua cuntenidade nas sues formas políticas, artísticas, literárias i relegiosas, splicable an parte debido als cundecionalismos geográficos, ambora las anfluéncias culturales i cuntatos cul strangeiro tenga sido tamien ua rialidade.
This article uses material from the Wikipedia Mirandés article Antigo Eigito, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Cuntenido çponibelizado ne ls termos de la CC BY-SA 4.0, salbo andicaçon an cuntrairo. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Mirandés (DUHOCTRUNGQUOC.VN) is an independent company and has no affiliation with Wiki Foundation.