Werkwoord: Klas van woorde wat die handeling (aksie) van 'n sin beskryf
Werkwoorde word in die grammatika onderken as 'n klas van woorde wat die handeling (aksie) van 'n sin beskryf.
Die werkwoord is die belangrikste woord in 'n sin en is daarom maklik om uit te ken. Tipiese werkwoorde is: eet, loop, praat, spring en ry. As voorbeeld, gegewe die sin: "Ek opdateer wikipedia.", is "opdateer" die werkwoord.
Tipes werkwoorde
Selfstandige werkwoord
'n Selfstandige werkwoord kan alleen (of selfstandig) in 'n sin staan. Voorbeelde:
- Hy opdateer die wiki.
- Sy bestuur haar motorfiets.
- Die man kap hout.
Hulpwerkwoorde
Hulpwerkwoorde help die selfstandige werkwoord. Voorbeelde:
- Die vrou het die wiki opgedateer. (dui verlede tyd aan)
- Die man sal môre die hout kap. (dui toekomende tyd aan)
Dié werkwoorde behoort tot die bedrywende vorm. Die onderwerp ("die vrou", "die man") is besig om iets te doen
Talle werkwoorde (die oorganklike werkwoorde) het ook 'n lydende vorm wat met ander hulpwerkwoorde gevorm word:
- Die koei word deur die man gemelk. (dui teenwoordige tyd van die lydende vorm aan)
- Die koei is deur die man gemelk. (dui verlede tyd van die lydende vorm aan)
- Die koei sal deur die man gemelk word (dui toekomende tyd van die lydende vorm aan).
Merk op dat die onderwerp ("die koei") nie besig is om iets te doen nie. Dis "die man" wat melk. In bedrywende vorm kan ons sê:
- Die man melk die koei
Hier is "die koei" die lydende voorwerp.
Koppelwerkwoorde
Koppelwerkwoorde word gebruik waar daar koppeling van die werkwoord nodig is. Voorbeelde:
- Die vrou is haastig. (koppeling tussen "Die vrou" (selfstandige naamwoord) en "haastig" (byvoeglike naamwoord)).
Die infinitief
Dit is gewoonlik waar die werkwoord na te of om te gebruik word. Voorbeelde:
- Hierdie huis is te koop.
- Om te swem is lekker.
- Om (vinnig) te stap, is goeie oefening
Soms het die infinitief sy eie vorm:
- ek het -- om te hê
- ek is -- om te wees
In die toekomende tyde word die infinitief ook sonder (om) te gebruik:
- ek sal sien
- ek sal wees
Die deelwoorde
- Sien deelwoord vir die hoofartikel
Die verlede tyd word gevorm met 'n voltooide deelwoord
Nie-saamgesteld
Die voltooide deelwoord van nie-saamgestelde werkwoorde kry ge-
- te werk -- ek het gewerk
- te sê -- ek het gesê
Werkwoorde wat eindig met -eer kan met of sonder ge- gebruik word
- te probeer -- ek het (ge)probeer.
Saamgesteld
Daar is twee tipes saamgestelde werkwoorde: skeidbaar en onskeidbaar
Skeidbaar
Die skeidbare werkwoord kry -ge-:
- oppas - op te pas - ek pas op - ek het opgepas
Die klemtoon is altyd op die eerste skeidbare deel: óppas.
Onskeidbaar
Die onskeidbare werkwoorde kry geen ge- nie:
- omarm - te omarm - ek omarm - ek het omarm
Die klemtoon is altyd op die tweede deel: omárm.
Sien ook
- Selfstandige naamwoord
- Byvoeglike naamwoord
- Bywoord
- Lidwoord
- Voegwoord
- Dieregeluide, werkwoorde wat die klanke van diere beskryf.
- Trappe van vergelyking
- Intensiewe
Eksterne skakels
Wikiwoordeboek het 'n inskrywing vir werkwoord.
This article uses material from the Wikipedia Afrikaans article Werkwoord, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Inhoud is onderhewig aan CC BY-SA 4.0, tensy anders vermeld. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Afrikaans (DUHOCTRUNGQUOC.VN) is an independent company and has no affiliation with Wiki Foundation.