Wi-Fi
Wi-Fi is ’n groep radiotegnologieë wat algemeen gebruik word vir die koordlose koppeling van ’n netwerk toestelle en is op die IEEE 802.11-groep standaarde gebaseer.
"Wi-Fi" is ’n handelsmerk van die Wi-Fi Alliance, wat die gebruik van die term "Wi-Fi-gesertifiseerd" beperk tot produkte wat toetse vir bedryfbaarheidsertifisering suksesvol voltooi het. Wi-Fi gebruik verskeie dele van die IEEE 802-protokolgroep en is ontwerp om glad te werk saam met die koordprotokol Ethernet.
| Internet- en netwerkprotokolle | |
|---|---|
| Toepassingvlak: | DNS FTP Gopher HTTP HTTPS IMAP IRC NNTP POP3 RTP SIP SMTP SNMP SSH SSL Telnet UUCP XMPP |
| Versendvlak: | DCCP SCTP TCP UDP |
| Netwerkvlak: | ARP ICMP IGMP IP(IPv4, IPv6) RARP |
| Dataskakelvlak: | ATM Ethernet FDDI PPP Token ring Wi-Fi |
| volgens die TCP/IP-model | |
Toestelle wat Wi-Fi-tegnologie kan gebruik, sluit in skootrekenaars, slimfone, tabletrekenaars, slim-TV-stelle, drukkers, digitale oudiospelers, digitale kameras, motors en hommeltuie. Versoenbare toestelle kan oor Wi-Fi met mekaar verbind word deur ’n koordlose toegangspunt sowel as gekoppelde Ethernet-toestelle, en kan gebruik word om toegang tot die internet te kry. So ’n toegangspunt (’n kuberkol of hotspot genoem) het ’n omvang van sowat 20 m binnenshuis en ’n groter omvang buitenshuis. ’n Wi-Fi-gebied kan so klein soos ’n enkele kamer wees wat radiogolwe blokkeer, of so groot soos verskeie vierkante kilometers deur die gebruik van talle oorvleuelende toegangspunte.
Die verskillende weergawes van Wi-Fi word deur verskeie IEEE 802.11-protokolstandaarde gespesifiseer, met die verskillende radiotegnologieë wat die omvang, golfbande en snelhede wat bereik kan word, bepaal. Wi-Fi gebruik meestal die 2,4 GHz- ultrahoë frekwensie (UHF) en 5 GHz superhoë frekwensie (SHF)-ISM-bande. Hulle is in verskillende kanale verdeel en elke kanaal kan tegelykertyd deur verskeie netwerke gedeel word. Baie algemene materiale absorbeer hierdie golflengtes, wat die omvang verder beperk, maar neig om versteurings tussen verskillende netwerke in digbewoonde gebiede te verminder. Sommige weergawes van Wi-Fi wat geskikte hardeware gebruik, kan ’n spoed van meer as 1 gigabis per sekonde bereik.
Wi-Fi is potensieel kwesbaarder vir aanvalle as koordnetwerke, want enigiemand binne die omvang van ’n netwerk met ’n koordlose beheerder kan toegang probeer kry. Wi-Fi Protected Access (WPA) is ’n groep tegnologieë wat geskep is om inligting oor Wi-Fi-verbindings te beskerm.
Verwysings
Eksterne skakels
- Wiki Afrikaans
Wiki Commons het meer media in die kategorie Wi-Fi. 
Hierdie artikel is vertaal uit die Engelse Wiki
This article uses material from the Wikipedia Afrikaans article Wi-Fi, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Inhoud is onderhewig aan CC BY-SA 4.0, tensy anders vermeld. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Afrikaans (DUHOCTRUNGQUOC.VN) is an independent company and has no affiliation with Wiki Foundation.