Suidelike Waterfiskaal
Die Suidelike waterfiskaal (Laniarius ferrugineus) ('ferrugineus' = roeskleurig) is 'n endemiese, algemene standvoël van woudrande, ruigtes en digte kusstreke.
Hulle bly een-een of in pare. Die voël is gemiddeld 22 cm groot en weeg 59 gram.
| Suidelike waterfiskaal | |
|---|---|
 | |
| Duetroep in Pondoland | |
| Wetenskaplike klassifikasie | |
| Domein: | |
| Koninkryk: | |
| Filum: | |
| Klas: | |
| Orde: | |
| Familie: | Malaconotidae |
| Genus: | Laniarius |
| Spesie: | L. ferrugineus |
| Binomiale naam | |
| Laniarius ferrugineus (Gmelin, 1788) | |
In Engels staan die voël bekend as die Southern boubou. Alhoewel hierdie standvoël en sy familie eens gereken was onder ware laksmanne in die familie Laniidae, is hulle nie naby verwant nie.
Die spesie word aangetref in suidoostelike Afrika, hoofsaaklik in Suidoos-Zimbabwe, die ooste van Botswana, Mosambiek en suidelike en oostelike Suid-Afrika. Hulle woon in digte bosse en woude, mangliet, struikgewas en tuine. In droër areas kom hulle voor in oewerwoud.
Beskrywing
Die manlike Suidelike waterfiskaal is 'n redelik kenmerkende 20–22 cm lang voël met swart bokante wat strek van die bokant van die kop tot by die stert, 'n treffende wit vlerkstreep, en 'n relatief lang swart stert met wit buitevere. Die onderlyf is wit en skakeer na roeskleurig op die maag, onderstert en flanke. Die bek, oë en bene is swart.
Die wyfie is soortgelyk aan die mannetjie, maar donkergrys bo-op en met 'n roeserige blos op die bors. Jong voëls lyk na die wyfie, maar met bruin gespikkel bo-op, 'n gelerige blos op die vlerkbalk, en is gestreep onder.
Die roeskleur op die onderlyf, wat die voël sy wetenskaplike naam gee, onderskei hom van die tropiese waterfiskaal en die moeraswaterfiskaal. Oppervlakkig lyk hulle soos die fiskaallaksman, Lanius collaris, maar het 'n korter stert met meer wit in die vlerke, en is minder opmerklik in gewoontes.
Gedrag
In teenstelling met die ware laksman wat in die oopte sit, verkies die Suidelike waterfiskaal om in digte plantegroei naby aan die grond te wei. Hierdie gewoonte het gelei tot die beskrywings skaam en sluiperig. Diëet-gewys vang die Suidelike waterfiskaal hoofsaaklik insekte wat op die grond of van lae takke af gevang word. Klein knaagdiere, akkedisse, slakke en vrugte is ook op die spyskaart.
Die Suidelike waterfiskaal gebruik 'n duetroep, met 'n ooo-whee-ooo, gevolg deur ooo-ooo-wheee, of wheee-wheee gevolg deur ooo-whee-ooo. Die duet het vele variasies, en die ooo-whee-ooo roep kan verkeerdelik uitgeken word as dié van die swartkopwielewaal. Die alarmroep is 'n dowwe kluk.
Sien ook
Bron
- Sasol Voëls van Suider-Afrika. Struik Nature. Vierde Uitgawe 2011. ISBN 978-1-77007-926-7
Verwysings
This article uses material from the Wikipedia Afrikaans article Suidelike waterfiskaal, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Inhoud is onderhewig aan CC BY-SA 4.0, tensy anders vermeld. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Afrikaans (DUHOCTRUNGQUOC.VN) is an independent company and has no affiliation with Wiki Foundation.