Smalkop-Kurper
Die smalkopkurper (Serranochromis angusticeps) is 'n varswatervis wat voorkom in die Okavangorivier, Kunenerivier, boonste gedeelte van die Zambezirivier en die Kafuerivier.
Dit kom ook in die sytakke van die Kongorivier in Zambië voor.
| Smalkopkurper | |
|---|---|
 | |
| Wetenskaplike klassifikasie | |
| Domein: | |
| Koninkryk: | |
| Filum: | |
| Subfilum: | |
| Infrafilum: | |
| Superklas: | |
| Klas: | |
| Subklas: | |
| Infraklas: | |
| Superorde: | |
| Orde: | |
| Familie: | |
| Subfamilie: | Pseudocrenilabrinae |
| Genus: | (Regan, 1920) |
| Spesie: | S. angusticeps |
| Binomiale naam | |
| Serranochromis angusticeps | |
In Engels staan die vis bekend as die Thinface largemouth of die Thinface bream.
Voorkoms
Die smalkopkurper het 'n groot kop met klein oë en 'n skuinsbek wat soos 'n konsertina oopvou. Die kop en lyf is redelik plat. Daar is drie tot vier rye enkelpunt, klein tandjies in die bokaak en twee tot drie rye onder. Die onderste keeltandbeen is smal en lank, met lang dun, enkel- of dubbelgepunte tande.
Die kop en lyf van beide geslagte het kenmerkende rooi kolletjies op. Volwasse mannetjies het 'n heldergeel kop en die stert- en dorsalevinne is blougrys met donker bruin kolle, die anale vin is geel met oranje kolletjies op. Die gespikkelde bek, wange en kiefdeksels is uniek aan die vis.
Die skubbe is grof en daar is 35 tot 39 op die systreep.
Die vis word tot 41 cm lank en die Zimbabwe-hengelrekord is 2.195 kg.
Habitat
Die smalkopkurper kom in alle tipes water voor maar verkies diep en stil water en lagunes met digte plantegroei.
Die vis se plat vorm help hom om ander visse te bekruip soos spesies van die genera Brycinus en Micralestes.
Hulle broei in die somer; die mannetjies maak neste by die plantegroei in water wat 1–3 m diep is.
Hengel vir smalkopkurper
Die smalkopkurper is 'n goeie sport- en eetvis. Alle tipes kunsaas werk goed, maar swaailemme is van die beste. Vir die beste hengel resultate moet die swaailem, lepel of kunsvissie, óf so na as moontlik aan die bodem óf so na as moontlik aan die plantegroei of rivierwal ingebring word.
Erdwurms, visaas of klein vissies, asook insekte werk goed. Waar tiervis afwesig is, of nie so volop is nie, kan lewendige aas soos die Imberi (Tweekol Tiervis), net onder 'n stroomversnelling gehengel, baie goeie resultate oplewer.
Dieselfde aas en hengeltegnieke wat vir die bloukurper gebruik word, kan ook met groot vrug op roofkurpers soos die smalkopkurper gebruik word.
Benaming
Die naam smalkop dui op die afstand tussen die oë. Hierdie vis was aanvanklik verwar met die kromkop-kurper en die twee was eers as 'n enkele spesie beskou.
Sien ook
Eksterne skakels
Bronne
- Skelton, Paul: A Complete Guide to the FRESHWATER FISHES of Southern Africa. 2001. ISBN 978-1-86872-643-1
- Botha, Willem: Hengelvisse in die Caprivi. 1984.
Verwysings
This article uses material from the Wikipedia Afrikaans article Smalkop-kurper, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Inhoud is onderhewig aan CC BY-SA 4.0, tensy anders vermeld. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Afrikaans (DUHOCTRUNGQUOC.VN) is an independent company and has no affiliation with Wiki Foundation.