Slawistiek
Slawistiek (alternatiewe spelling: Slavistiek) of Slawiese filologie (ook respektiewelik Slavistiek en Slaviese filologie) is die wetenskap van die tale en kultuur van die Slawiese volke.
In Duitsland, waar Slawistiek 'n lang en ryk tradisie het, word dit as die studieveld van Slawiese tale en literature gedefinieer en behels gevolglik hoofsaaklik taalkunde en literatuurwetenskap, terwyl geskiedkundiges, teoloë, argeoloë, kunshistorici, opvoedkundiges, aardrykskundiges, ekonome, regs- en politiekwetenskaplikes en sosioloë wat hulle met die Slawiese lande besig hou, binne die konteks van akademiese sistematiek nie by die tradisionele Slawistiek gereken word nie. Hierdie akademiese dissiplines word saam met die Slawistiek as Osteuropakunde gedefinieer - soos byvoorbeeld in die naam van die Deutsche Gesellschaft für Osteuropakunde.
Die Slawistiek word verder verdeel in Oos-Slawiese, Wes-Slawiese en Suid-Slawiese tale en literature. Op taalvlak kan dit verder verdeel word in Belorussistiek (Wit- of Belo-Russies), Bohemistiek (Tsjeggies), Bulgaristiek, Kasjoebologie, Polonistiek (Pools), Russistiek, Serwistiek, Serbokroatistiek, Slowakistiek, Slowenistiek, Sorabistiek en Oekraïnistiek. Na die studievelde Ou-Kerkslawies en Oer-Slawies word soms ook as Ouslawistiek, Paleoslawistiek of Kerkslawistiek verwys.
Op internasionale vlak is die Slawiste in die Internasionale Slawistekomitee georganiseer wat vyfjaarliks die Internasionale Kongres van Slawiste hou en alle vakgebiede behels.
Slawistiek binne die wyer veld van Oos-Europese Studies
Naas taalonderrig word binne die wyer veld van Oos-Europese Studies, waarvan Slawistiek dikwels deel uitmaak as een dissipline, ook aandag geskenk aan Slawiese literatuur- en taalwetenskap, Slawiese kultuurwetenskap, ekonomie en politieke studies.
Belangrike akademiese instellings vir Oos-Europese Studies
- Duitsland
- Forschungsverbund Ost- und Südosteuropa (webtuiste)
- Osteuropa-Institut der Freien Universität Berlin / Institute for East European Studies (webtuiste)
- Switserland
- Universität Zürich (UZH) - Center for Eastern European Studies (webtuiste)
- Verenigde State
- Harriman Institute, Columbia-universiteit te New York (webtuiste)
Verwysings
Eksterne skakels
- Internasionale verenigings van slawiste
This article uses material from the Wikipedia Afrikaans article Slawistiek, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Inhoud is onderhewig aan CC BY-SA 4.0, tensy anders vermeld. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Afrikaans (DUHOCTRUNGQUOC.VN) is an independent company and has no affiliation with Wiki Foundation.