Renault F1

Renault se verwantskap in Formule Een motorsport is beide as vervaardiger en enjinverskaffer vir verskeie tydperke sedert 1977. In 1977 het die maatskappy by Formule Een aangesluit as 'n vervaardiger, met sy bekendstelling van 'n turbo-enjin in sy eerste motor, die Renault RS01. In 1983 het Renault ook begin om enjins aan ander spanne te verskaf.

Hoewel die Renault-span heelwat renne gewen het en sterk meegeding het om die wêreldtitel, het hulle aan die einde van 1985 onttrek nadat die span se Formule Een-skandaal aan die lig gekom het. Renault het egter voortgegaan om enjins aan ander spanne te verskaf tot 1986, en weer van 1989 tot 1997.

Renault het teruggekeer tot Formule Een in 2000 toe dit die Enstone-gebaseerde Benetton Formula-span (voorheen Toleman Motorsport) verkry het, 'n span wat die bestuurderskampioenskap in 1994 gewen het en beide die bestuurders- en vervaardigerskampioenskappe in 1995. Vir die eerste twee seisoene onder Renault is die span steeds Benetton Formula genoem en "Benetton" gebruik as hul vervaardigersnaam. In 2002 het Renault die span na die Renault F1 Team herdoop en "Renault" begin gebruik as sy vervaardigersnaam. Hul het daarna beide die bestuurders- en vervaardigerskampioenskappe gewen, twee jaar na mekaar in 2005 en 2006.

By die 2008 Singapoerse Grand Prix (die eerste Grand Prix ooit wat in die nag gehou is) het Nelson Piquet jnr beheer oor sy motor verloor aan die buitekant van draai 17, oor die pad gegly en teen 'n muur gebots. Baie rommel is hierdeur oor die pad gestrooi, wat beteken dat die veiligheidsmotor uitgeroep moes word om die motors stadig deur die baan te lei om die werkers wat die pad skoonmaak, te beskerm. Dit het die gaping tussen die motors toegemaak, wat beteken het dat hulle nou baie naby aan mekaar gejaag het. Dit het Fernando Alonso, wat in die 15de plek was, toegelaat om die stadiger minder ervare jaers verby te steek. Alonso het voortgegaan om wedren te wen. Nadat Renault Piquet jnr in 2009 afgedank het vir sy swak bestuurswerk, het hy aan die FIA vertel dat Flavio Briatore, die baas van die Renault F1-span (wat al 20 jaar die spanhoof was, en al voorheen bedrieglik opgetree het), hom oor die radio aangesê om doelbewus met sy motor te bots, om die veiligheidsmotor uit te bring en Alonso 'n beter wenkans te gee. Alonso was toe nie, of selfs voor die ongeluk, daarvan bewus nie.

Die Renault F1-span is in 2012 hernoem na die Lotus F1-span en het in 2015 Mercedes-Benz enjins in hul renmotors gebruik, nie meer dié van Renault nie.

Renault het op 3 Desember 2015 aangekondig dat hulle vanaf die 2016-seisoen weer die span by Lotus oorgeneem het en dat hulle met 'n fabriekspan na Formule 1 terugkeer. Hiermee het Renault vir die eerste keer sedert 2011 'n fabriekspan in Grands Prix bestuur. Kevin Magnussen en Jolyon Palmer vorm die span se jaers. Die span het eintlik 'n onderstel gebruik wat grootliks onder die naam van Lotus gebou is, en daar was min geleentheid om die motor te ontwikkel weens 'n gebrek aan geld. As gevolg hiervan was die seisoen 'n teleurstelling: in net drie Grands Prix is punte aangeteken en die span eindig negende in die vervaardigerskampioenskap.