Rabindranath Tagore: Bengale digter en filosoof
Rabindranath Tagore, of Thakur (Kalkutta, 7 Mei 1861 – 7 Augustus 1941), was 'n beroemde digter, roman- en toneelskrywer.
Hy was die eerste mens van Indië wat 'n Nobelprys gewen het.
Rabindranath Tagore | |
|---|---|
 Rabindranath Tagore in Kalkutta, ongeveer 1915 | |
| Gebore | 7 Mei 1861 |
| Sterf | 7 Augustus 1941 Kalkutta |
| Nasionaliteit |  Brits-Indië |
| Beroep | Digter, skrywer |
| Eggenoot | Mrinalini Bhabatarini |
| Kinders | 5 |
| Handtekening | |
 | |
Familie
Rabindranath Tagore is op 7 Mei 1861 tydens die Britse koloniale oorheersing van Indië in 'n ryk Brahmaanse familie gebore wat in Kalkutta gewoon het. Sy vader, Debendranath Tagore (1817–1905), was 'n tyd lank een van die leiers van die Brahmo Samaj (Vereniging van Godsoekers). Sy moeder, Sarada Devi, is dood toe hy nog jonk was. In 1883 is hy met Mrinalini Devi (gebore Bhabatarini) getroud wat toe slegs tien jaar oud was. Hulle het vyf kinders gehad, waarvan slegs een volwassenheid bereik het. Mrinalini is in 1902 oorlede. Tagore self is op 7 Augustus 1941 in Kalkutta oorlede.
Letterkundige verdienste
Tagore was 'n Bengaalse digter, filosoof, dramaturg, romanskrywer en mistikus wat sy roem veral aan sy gedigte te danke gehad het. Hy het sy eerste gedig op agtjarige ouderdom geskryf en sy eerste versameling gedigte in 1877 gepubliseer. Hy het sy eerste kortverhaal en dramas geskryf toe hy slegs 16 jaar oud was.
Tagore het 'n soort letterkunde geskep wat nader aan gesproke Bengaals was as dié van ander skrywers. Hoewel hy hoofsaaklik in Bengaals geskryf het, het hy baie van sy werk in Engels vertaal. Daarin kom kennis van beide Westerse en Indiese kulture tot uitdrukking.
In 1901 stig hy die Santi-Niketanskool in Bolpur, 180 km van Kalkutta, wat later tot 'n universiteit gegroei het. Hy het baie oor sosiale en politieke onderwerpe geskryf en in sy wêreldbeskouing doelbewus gestreef na 'n harmonieuse verband tussen die Westerse en Oosterse filosofieë, godsdienste en kulture. As sulks het hy 'n belangrike rol in die bevryding van Indië gespeel.
Hy het in verskillende lande klas gegee en het Europa en Amerika gereeld besoek, veral nadat hy die Nobelprys vir Letterkunde in 1913 ontvang het. Tot sy werk behoort 'n treurspel met die Engelse titel, The King of the Dark Chamber (1910), en verskeie romans, waarvan Gora (1908) deur sommige as belangriker as Rudyard Kipling se skildering van die Indiese lewe in Kim (1901) beskou word.
Tagore bly egter veral bekend as 'n digter. Sy vertaling van sy eie Gitanjali (1909) het groot bewondering ontlok. In 1950 is sy gedig Jana-Gana-Mana (Engels: Lord of the heart of the people) getoonset en het dit die volkslied van Indië geword.
Verwysings
Eksterne skakels
- Roberts, Esther: Rabindranath Tagore. In: Lantern.Tydskrif vir Kennis en Kultuur. Jaargang 23, nr. 1, September 1973
- Wiki Afrikaans
Wiki Commons het meer media in die kategorie Rabindranath Tagore.
This article uses material from the Wikipedia Afrikaans article Rabindranath Tagore, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Inhoud is onderhewig aan CC BY-SA 4.0, tensy anders vermeld. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Afrikaans (DUHOCTRUNGQUOC.VN) is an independent company and has no affiliation with Wiki Foundation.