Pioneer-Plaat

 

Die boonste afbeelding is ’n skematiese voorstelling van die hiperfynstruktuur van waterstof (H₂); dit is die chemiese element wat die volopste in die heelal voorkom. Die oorgang van ’n waterstofatoom van een energietoestand na ’n ander gee ’n energieverskil wat ooreenstem met ’n golflengte van 21,1 cm, wat weer ooreenstem met ’n frekwensie van 1420,406 MHz. Dié lengte word gebruik as eenheid vir die ander afbeeldings.

Daaronder is ’n vertikale lyn wat die binêre getal 1 aandui.

 

’n Afbeelding van ’n man en vrou wat voor die ruimtetuig staan, kom regs onder dit voor. Tussen die strepies waar die vrou se lengte aangedui word, kan die binêre voorstelling van die syfer 8 gesien word (1000, met ’n etsfout in die eerste 0). Die waterstofatoom-eenheid van 21,1 cm wat gebruik word, gemaal met 8 gee 168,8 cm, die gemiddelde lengte van ’n vrou.

 

Agter die mense is ’n skematiese voorstelling van die ruimtetuig, op dieselfde skaal as die man en vrou. Die tuig se afmetings kan dus hieruit afgelei word.

 

Die afbeelding links hiervan toon vyftien lyne wat uit ’n gemeenskaplike oorsprong kom. Veertien lyne is opgebou uit strepies; elk stel ’n binêre getal voor wat ooreenstem met die frekwensie van ’n pulsar (pulserende ster). Die gemeenskaplike oorsprong stel die posisie van die Son voor.

Die vyftiende lyn, wat na regs verby die twee figure strek, gee die afstand tussen die Son en die middelpunt van die Melkweg.

Aangesien die frekwensie van pulsars mettertyd verander, kan die tyd waarop die ruimtetuig gelanseer is, afgelei word.

Dié afbeelding kom ook op die Voyager Goue Plaat voor.