Paul Louw: Suid-Afrikaanse minister en skrywer

Paul Louis Louw (Hopetown, 6 Januarie 1890 - Kaapstad, 14 Februarie, 1933) was 'n predikant in die Nederduitse Gereformeerde Kerk en 'n Afrikaanse digter.

Hy is een van ses kinders van Jan Daniël Louw en Elizabeth Johanna Röntgen.Van kleinsaf voel hy ’n roeping in sy lewe om die Woord van God te bedien. Ná voorbereidende studie is hy na Stellenbosch, waar hy aan die einde van 1914 sy proponentseksamen aflê. Vanaf 1915 tot 1920 bedien hy die gemeente op Venterstad, waarna hy ’n beroep na Dealesville aanneem. Hier bly hy tot die einde van Januarie 1926, waarna hy na Kareedouw is. Hier het hy met sy organisasietalent, sy opgewektheid en vriendelikheid, sy heldere en pakkende evangeliebediening die gemeente so met moed besiel en aan hom gebind dat hulle hom gewillig gevolg het. Hy is een van die eerste NG-predikante wat in Afrikaans preek.

Op 11 April 1916 trou hy met Jacoba Frederika Petronella Francina Magdalena Vos en die egpaar het sewe kinders, onder andere Jan Daniël Louw (later ’n wetenskaplike) en Louis Louw (later redaksielid van Die Burger).

Tydens die Sinode van 1932 ontvang hy ’n beroep na Piketberg, wat hy aanvanklik aanneem. Hy trek egter hierdie aanname terug wanneer hy kort daarna uitvind dat hy aan ’n ongeneeslike siekte ly. Hoewel die aard van die siekte nie bekend is nie, was dit waarskynlik kanker.

Paul is op 14 Februarie 1933 in Kaapstad oorlede en is op Kareedouw begrawe

Onder die skuilnaam Lodovikus verskyn sy eerste verse in Die Kerkbode en Die Burger en sy eerste bundel het in 1920 verskyn, naamlik Ontwaking en ander gedigte. Hierin gee hy duidelike blyke van sy tegniese vaardigheid, hoewel daar nie verrassende insigte na vore kom nie. Temas wat hy aanspreek is onder andere die natuur, terwyl daar ook roudigte en enkele kinderversies is. Van hierdie gedigte word deur Pirow Bekker opgeneem in die versamelbundel Digters op die toring, met gedigte van die digters uit die twintigerjare, en deur D.F. Malherbe in die versamelbundel “Afrikaanse letterkunde”. Saam met Jan F.E. Celliers en G.B.A. Gerdener doen hy ook van die eerste vertalings van die Gesange in Afrikaans, wat as “Proewe van oorsetting van de Gesange-bundel in Afrikaans” in 1924 in Amsterdam gepubliseer word. Hierdie vertalings word egter nooit deur die kerke goedgekeur nie.

• (af) Nienaber, P.J. Hier Is Ons Skrywers! Biografiese Sketse van Afrikaanse Skrywers. Johannesburg: Afrikaanse Pers-Boekhandel
• Smit, ds. A.P.. Eeufeesalbum Hanover. Hanover: N.G. Kerkraad.
• Olivier, ds. P.L., Ons gemeentelike feesalbum. Kaapstad en Pretoria: N.G. Kerk-uitgewers, 1952.

Boeke

• Dekker, G. “Afrikaanse Literatuurgeskiedenis” Nasou Beperk Kaapstad Elfde druk 1970
• Kannemeyer, J.C. “Geskiedenis van die Afrikaanse literatuur 1” Academica, Pretoria en Kaapstad Tweede druk  1984
• Nienaber, P.J. “Hier is ons skrywers!” Afrikaanse Pers-Boekhandel Johannesburg Eerste uitgawe 1949
• Nienaber, P.J.; Senekal, J.H en Bothma, T.C. “Mylpale in die geskiedenis van die Afrikaanse letterkunde”
• Afrikaanse Pers-Boekhandel Tweede hersiene uitgawe 1963
• Nienaber, P.J. et al “Perspektief en Profiel” Afrikaanse Pers-Boekhandel Johannesburg Derde hersiene uitgawe 1969
• Pienaar, E.C. “Taal en poësie van die Twede Afrikaanse Taalbeweging” Nasionale Pers Beperk Kaapstad,
• Stellenbosch en Bloemfontein Vierde vermeerderde druk 1931

Internet

• Eggsa: http://www.eggsa.org/library/main.php?g2_itemId=52161
• Geni: https://www.geni.com/people/Paul-Louis-Louw/2217300