Marilyn Monroe

Marilyn Monroe (1 Junie 1926 – 4 Augustus 1962) was 'n Amerikaanse aktrise, sangeres, model en rolprentvervaardiger.

Marilyn Monroe
Monroe in The Prince and the Showgirl (1957)
Geboortenaam	Norma Jeane Mortenson
Geboorte	1 Junie 1926 Los Angeles, Kalifornië
Sterfte	5 Augustus 1962 (op 36) Los Angeles, Kalifornië
Nasionaliteit	Verenigde State
Beroep(e)	Aktrise, sanger, model, rolprentvervaardiger
Rolprente	Niagara, Gentlemen Prefer Blondes, River of No Return, The Seven Year Itch, Some Like It Hot, The Misfits
Toekennings	Golden Globe vir Some Like it Hot
Internet-rolprentdatabasis-profiel

 

Monroe in Gentlemen Prefer Blondes (1953).

 

Monroe tree voor Amerikaanse troepe op.

Ná sy 'n groot deel van haar jeug in weeshuise deurgebring het, het Monroe haar loopbaan as 'n model begin, wat tot 'n rolprentkontrak in 1946 gelei het. Haar vroeë rolle was klein, maar haar rolle in The Asphalt Jungle (1950) en All About Eve (ook 1950) is goed ontvang en namate haar loopbaan gevorder het, het sy as 'n sekssimbool bekend geword. Sy het lof ontvang vir haar komediese vermoë in rolprente soos Gentlemen Prefer Blondes, How to Marry a Millionaire en The Seven Year Itch. Sy was in die 1950s en 1960s een van Hollywood se gewildste aktrises.

Monroe het dikwels gesukkel om rolle anders as die "dom blondine" te kry en sy het doelbewus probeer om hierdie beeld van haar af te skud. Sy het drie mislukte huwelike gehad: met polisieman James Dougherty (1942–1946), bofbalspeler Joe DiMaggio (1954–1954) en toneelskrywer Arthur Miller (1956–1961). Dit was gedurende haar huwelik met Miller wat sy by die Actors Studio gestudeer het en die maatskappy Marilyn Monroe Productions gestig het. Haar dramatiese rol in William Inge se Bus Stop is deur die kritici geprys en sy het 'n Golden Globe-toekenning gewen vir haar rol in Some Like it Hot.

Die laaste jare van Monroe se lewe was gevul met gesondheidsprobleme, persoonlike probleme en 'n reputasie as 'n onverantwoordelike en moeilike medewerker. Daar word steeds gegis oor die omstandighede van haar dood, as gevolg van 'n oordosis barbiturate. Alhoewel haar dood amptelik as 'n "waarskynlike selfmoord" geklassifiseer word, word die moontlikheid van 'n dood per abuis nie buite rekening gelaat nie. Samesweringsteoritici beweer dat sy vermoor is.

In 1999 het Monroe op die sesde plek van die American Film Institute se ranglys van die grootste vroulike sterre van alle tye verskyn.

 

Monroe poseer vir fotograwe tydens die verfilming van The Seven Year Itch, September 1954.

Rolprente

• 1947: Dangerous Years
• 1948: Scudda Hoo! Scudda Hay!
• 1948: Ladies of the Chorus
• 1949: Love Happy
• 1950: A Ticket to Tomahawk
• 1950: The Asphalt Jungle
• 1950: All About Eve
• 1950: The Fireball
• 1951: Right Cross
• 1951: Home Town Story
• 1951: As Young as You Feel
• 1951: Love Nest
• 1951: Let's Make It Legal
• 1952: Clash by Night
• 1952: We're Not Married!
• 1952: Don't Bother to Knock
• 1952: Monkey Business
• 1952: O. Henry's Full House
• 1953: Niagara
• 1953: Gentlemen Prefer Blondes
• 1953: How to Marry a Millionaire
• 1954: River of No Return
• 1954: There's No Business Like Show Business
• 1955: The Seven Year Itch
• 1956: Bus Stop
• 1957: The Prince and the Showgirl
• 1959: Some Like It Hot
• 1960: Let's Make Love
• 1961: The Misfits
• 1962: Something's Got to Give

•   Wikimedia Commons het meer media in die kategorie Marilyn Monroe.