Laniakea-Superswerm: Plaaslike superswerm

Dit is in September 2014 geïdentifiseer toe ’n groep sterrekundiges, onder andere R. Brent Tully van die Universiteit van Hawaii en Helene Courtois van die Universiteit van Lyon in Frankryk, ’n nuwe manier publiseer om superswerms te definieer volgens die relatiewe snelhede van sterrestelsels. Laniakea word ook die Plaaslike Superswerm genoem en die vorige Plaaslike Superswerm, Virgo, maak nou deel van die groter superswerm uit.

Die Laniakea-superswerm bevat 100 000 sterrestelsels oor ’n gebied van 520 miljoen ligjare. Dit het die geraamde bindingsmassa van sowat 10¹⁷ sonmassas, of honderdduisend keer dié van die Melkweg. Dit bestaan uit vier onderdele, wat voorheen beskou is as vier aparte superswerms:

• Virgo-superswerm, die deel waarin die Melkweg lê.
• Hydra-Centaurus-superswerm, waarin die Groot Aantrekker hom bevind – dit is Laniakea se massamiddelpunt.
• Pavo-Indus-superswerm
• Suidelike Superswerm, insluitende die Fornax-, Dorado- en Eridanus-sterrestelselswerm.

Die sterrestelselswerms met die grootste massa in Laniakea is Virgo, Hydra, Centaurus, Abell 3565, Abell 3574, Abell 3521, Fornax, Eridanus en Norma. Die hele superswerm bevat sowat 300 tot 500 bekende sterrestelselswerms en -groepe. Dit kan veel meer wees omdat baie van hulle tans aan die ander kant van die Melkweg is, waar hulle feitlik onwaarneembaar is (in die Sone van Ondeursigtigheid).

Superswerms is van die grootste strukture in die heelal en hul grense is moeilik om te bepaal, veral van binne af. Die span het radioteleskope gebruik om die bewegings van ’n groot groep plaaslike sterrestelsels uit te stippel. In ’n gegewe superswerm sal al dié bewegings na binne wees, in die rigting van die massamiddelpunt. In Laniakea se geval is dié swaartekrag-fokuspunt die Groot Aantrekker, en dit beïnvloed die beweging van onder meer die Plaaslike Groep van sterrestelsels waarin die Melkweg lê. Anders as die sterrestelselswerms waaruit dit bestaan, word Laniakea nie deur swaartekrag bymekaargehou nie en lyk dit of die superswerm uitmekaargeskeur word deur donker energie.

Die superswerms wat Laniakea omring, is die Shapley-, Hercules-, Coma- en Perseus-Pisces-superswerm. Die grense van dié swerms en van Laniakea was nog nie presies bekend toe Laniakea geïdentifiseer is nie.

Laniakea is self deel van die Pisces-Cetus-superswermkompleks, 'n galaktiese filament.

Die naam "Laniakea" beteken "onmeetbare hemel" in Hawais, van lani vir "hemel" en akea vir "ruim" of "onmeetbaar". Dit is ter ere van Polinesiese navigators wat kennis oor die hemel gebruik het om die Stille Oseaan te verken.

• Superswerm
• Groot Aantrekker

• Vimeo, "Laniakea Supercluster", Daniel Pomarède, 4 September 2014 — videovoorstelling van die bevindings
• YouTube, "Laniakea: Our Home Supercluster", Nature Video, 3 September 2014 — Hervasstelling van die grense van die kosmiese kaart
• Wiki Afrikaans  Wiki Commons het meer media in die kategorie Superswerms.
•   Hierdie artikel is vertaal uit die Engelse Wiki

Die Aarde se posisie in die heelal   Aarde   Sonnestelsel   Gould-gordel   Orion-arm   Melkweg   Plaaslike Groep   Virgo-SS   Laniakea-SS   Heelal