Kultivar: Plant of plantgroep geselekteer vir sekere eienskappe

Gewilde sierplante vir die tuin soos rose, kamelias, affodille, bergrose en asaleas is kultivars wat deur versigtige seleksie of teling gekweek is vir die blom se kleur of vorm. Voedselgewasse is ook meestal kultivars wat geselekteer is vir eienskappe soos groter oeste, smaak en weerstand teen siektes. In die houtbedryf word bome geplant wat geselekteer is vir die hoeveelheid en gehalte hout wat dit lewer.

Die term "kultivar" is ’n samesmelting van die Engelse woorde "cultivated" en "variety". ’n Kultivar verskil van ’n variëteit en verskillende reëls word toegepas by die naamgewing.

Die internasionale vereniging vir die beskerming van nuwe variëteite plante (UPOV – Frans: Union internationale pour la protection des obtentions végétales) bied regsbeskerming aan mense en organisasies wat nuwe kultivars vir die handel bekend stel. UPOV vereis dat ’n kultivar eiesoortig, eenvormig en stabiel is. Om eiesoortig te wees, moet dit eienskappe hê wat maklik onderskeibaar is van ander bekende kultivars. Om eenvormig en stabiel te wees, moet dit hierdie eienskappe behou wanneer dit herhaaldelik voortgeplant word.

’n Kultivar kry ’n spesifieke naam: dit bestaan uit die wetenskaplike naam, gevolg deur die kultivarnaam in enkel-aanhalingstekens. Die naam van die King Edward-aartappel is byvoorbeeld Solanum tuberosum 'King Edward'.

• Verkooppunt van die laaste uitgawe (Oktober 2009) Geargiveer 12 Desember 2015 op Wayback Machine van The International Code of Nomenclature for Cultivated Plants
• "International Cultivar Registration Authorities"
•   Hierdie artikel is vertaal uit die Engelse Wiki