Korubo
Die Korubo of Korubu is ’n inheemse volk van Brasilië wat in die laer Vale do Javari in die westelike Amasonebekken woon.
Die groep noem hulself die Dslala en in Portugees word na hulle verwys as caceteiros ("knuppelslaners"). Baie van wat die buitewêreld van hulle weet, is danksy die navorsing van die Brasiliaanse ontdekkingsreisiger Sydney Possuelo, wat die stam in Oktober 1996 die eerste keer gekontak het, en die joernalis Paul Raffaele.
| Korubo | |
|---|---|
| Totale bevolking: | Sowat 170 |
| Belangrike bevolkings in: |  Brasilië |
| Taal: | Korubo |
| Geloofsoortuiging: | Geen |
| Verwante etniese groepe: | |
Die Korubo is een van die laaste feitlik geïsoleerde volke van die wêreld, hoewel hulle al talle gewelddadige botsings met nabygeleë gemeenskappe gehad het.
Kultuur
Hul gekose jag- en oorlogswapen is die knuppel, en buiten giftige veerpyle gebruik hulle nie ander wapens nie. Hul werkdag is sowat vier tot vyf uur lank en hulle woon dikwels in groot gemeenskaplike hutte, wat malocas genoem word.
Hulle het geen bekende godsdienspraktyke nie, maar beoefen om ’n onbekende rede soms kindermoord. Beide mans en vroue verf hul met rooi kleurstof wat gemaak word van die sade van ’n plaaslike plant. Hul dieet sluit in slingerape, vis, pekari, voëls, wildevarke, vrugte en mielies. Malaria is ’n groot oorsaak van siektes en sterftes in die stam. Hulle het ’n karige kennis van landbou en maak stukke grond skoon om gewasse te plant.
National Geographic het in Augustus 2003 ’n artikel, After First Contact, oor hulle geplaas en The Smithsonian het in April 2005 ook ’n artikel, Out of Time, gepubliseer.
Geskiedenis
Die eerste vreedsame kontak is in 1972 met hulle gemaak en daarna het Brasilië se Nasionale Indiaanse Stigting (Funai) verskeie amptenare verloor in pogings om ’n verhouding met hulle op te bou. Dit het eindelik in 1996 gebeur.
Min is oor die groep bekend, want Funai weier dat antropoloë hulle bestudeer. Die Korubo het in die verlede mense wat op hul grondgebied oortree, vermoor. Die laaste voorval was in 2000. Funai help hulle deur hulle moderne immuniteitsinspuitings te gee en dikwels uit te vind hoe dit gaan. Die stigting het ook ’n nasionale park gestig wat die Korubo se grond insluit om houtkappery in die gebied te keer. Hul doel is om verdere kontak deur die moderne gemeenskap met die stam te voorkom sodat hul leefwyse bewaar kan bly.
Verwysings
Eksterne skakels
Hierdie artikel is vertaal uit die Engelse Wiki
This article uses material from the Wikipedia Afrikaans article Korubo, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Inhoud is onderhewig aan CC BY-SA 4.0, tensy anders vermeld. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Afrikaans (DUHOCTRUNGQUOC.VN) is an independent company and has no affiliation with Wiki Foundation.