Kazbek: Berg op Die grens Van Georgië En Rusland

Dit lê op die grens tussen Rusland en Georgië – in Rusland se streek Noord-Ossetië en Georgië se Kazbegi-distrik.

Kazbek Mqinvartsveri Basjlam
Die berg Kazbek.
Ligging	Rusland, Georgië
Hoogte	5 034 meter bo seevlak
Prominensie	2 353
Reeks	Kaukasus
Koördinate	42°41′57″N 44°31′06″O / 42.69917°N 44.51833°O / 42.69917; 44.51833 44°31′06″O / 42.69917°N 44.51833°O / 42.69917; 44.51833
Bergtipe	Rustende stratovulkaan
Laaste uitbarsting	~750 v.C.
Kazbek Die ligging van Kazbek op die grens van Rusland en Georgië.

Die Kazbek is een van die 10 hoogste pieke in Rusland, die derde hoogste piek in Georgië en die sewende hoogste kruin in die Kaukasusberge. Dit is die tweede hoogste vulkaniese kruin in die Kaukasus, naas die berg Elbroes.

Die Kazbek is Russies en was die naam van 'n plaaslike Ossetiese prins. Die berg se naam in Georgies is მყინვარწვერი, Mqinvartsveri, "Gletserspits" of "Ysspits". ('n Ander Georgiese naam is ყაზბეგი, Kazbegi.) Die Wainachse naam, Bashlam, beteken "Gesmelte Berg".

 

Aan die oostelike voetheuwels van die Kazbek loop die Georgiese Militêre Pad deur die Darialpas van 2 378 m. Die streek is tektonies baie aktief, met verskeie klein aardbewings wat gereeld voorkom. 'n Aktiewe warmwaterbron kom ook voor. Kazbek is 'n potensieel aktiewe vulkaan met die vorm van 'n dubbele keël, waarvan die basis op 'n hoogte van 1 770 m lê.

Vanweë sy steil hange is die Kazbek se gletsers nie baie groot nie. Die totale gekombineerde oppervlakte van die gletsers is 135 km². 'n Groot instorting van 'n gletser aan die berg se noordoostelike hang op 20 Augustus 2014 het tot sewe mense se dood gelei. Die gletser se instorting het die Terekrivier laat opdam en dit het die Georgiese Militêre Pad laat oorstroom.

Van 24 tot 28 Mei 2019 het die Kaukasiese Skitoernetwerk 'n ekspedisie georganiseer om die Kazbek se hoogte te herbepaal. Op 27 Mei 2019 is 'n GPS-ontvanger vir die eerste keer op die Kazbek se spits geplaas. Die nuwe hoogte is met 'n akkuraatheid van 5 mm bepaal op 5 053,927 m.

Die berg Kazbek (Kazbegi) word in Georgiese folklore verbind met Amirani, die Georgiese weergawe van die Griekse Prometeus, wat aan 'n berg vasgeketting is as straf omdat hy vuur van die gode gesteel en dit vir mense gegee het. Die ligging van dié toneel het later die terrein geword van 'n Ortodokse kluisenaarshut in 'n grot met die naam "Betlemi" (Betlehem) op 'n hoogte van sowat 4 000 m. Volgens legendes het dié grot baie heilige relieke gehuisves, soos Abraham se tent en die kind Jesus se krip.

• Wiki Afrikaans  Wiki Commons het meer media in die kategorie Kazbek.

•   Hierdie artikel is in sy geheel of gedeeltelik uit die Engelse Wiki vertaal.