Switserse Kantons: Administratiewe afdelings van die Switserse Konfederasie

Hulle is deelstate van die Switserse Konfederasie.

Elkeen van die kantonne beskik oor sy eie grondwet, wetgewende mag, regering en howe. Die meeste kantonale parlemente is eenkamerstelsels met tussen 58 en 200 setels. 'n Klein aantal van parlemente word deur sogenaamde Landsgemeinden gevorm, dit wil sê 'n vergadering van alle burgers wat oor wetsake besluit neem. Vroue het in enkele kantonne eers in 1971 stemreg by die vergaderings gekry.

Alle aangeleenthede wat volgens die Switserse grondwet nie uitdruklik onder die gesag van die konfederasie val nie, word deur die kantonne gereël. Ook die graad van selfregering wat die munisipaliteite geniet, word deur die kantonne bepaal en verskil dus grootliks. Daar is ook groot verskille wat die oppervlakke en bevolkingsyfers van die kantonne betref: Oppervlakke variëer tussen 37 en 7 105 vierkante kilometer, terwyl die bevolkings tussen 14 900 en 1 244 400 beloop.

Direkte demokrasie in die vorm van algemene vergaderings word ten opsigte van kantonale sake tans nog slegs in die kantonne Appenzell-Innerrhoden en Glarus toegepas. In alle ander kantonne gaan burgers nou stembus toe om hulle demokratiese regte waar te neem.

Sedert die stigting van die Franssprekende kanton Jura in 1978 is daar geen nuwe kantonne meer geskep nie. Volgens die grondwet van 1999 is daar amptelik 26 kantonne. Die aantal state wat 'n rol speel by die verkiesing van die Eerste Kamer (Duits: Ständerat, Frans: Conseil des États) van die Switserse Konfederasie en die stemming by federale wetsontwerpe, beloop egter 23: Die kantonne Unterwalden, Appenzell en Basel bestaan elkeen uit twee halfkantonne. Unterwalden word verdeel in Obwalden en Nidwalden, Appenzell in Appenzell-Innerrhoden en Appenzell-Ausserrhoden en Basel in Basel-Stad en Basel-Landschaft.

Wapen	Data kode	Kanton	Sedertdien	Hoofstad	Bevolking	Oppervlakte (km²)	Bevolkingsdigtheid (per km²)	Aantal munisipaliteite	[[Amptelike tale]]
	ZH	Zürich	1351	Zürich	1 443 436	1 729	701	171	Duits
	BE	Bern	1353	Bern	1 009 418	5 959	158	383	Duits, Frans
	LU	Luzern	1332	Luzern	394 604	1 493	233	87	Duits
	UR	Uri	1291	Altdorf	36 008	1 077	33	20	Duits
	SZ	Schwyz	1291	Schwyz	152 759	908	143	30	Duits
	OW	Obwalden	1291 or 1315 (as deel van Unterwalden)	Sarnen	36 834	491	66	7	Duits
	NW	Nidwalden	1291 (as Unterwalden)	Stans	42 080	276	138	11	Duits
	GL	Glarus	1352	Glarus	39 794	685	51	3	Duits
	ZG	Zug	1352	Zug	120 089	239	416	11	Duits
	FR	Fribourg	1481	Fribourg	303 377	1 671	141	167	Frans, Duits
	SO	Solothurn	1481	Solothurn	263 719	790	308	122	Duits
	BS	Basel-Stadt	1501 (as Basel tot en met 1833)	Basel	196 850	37	5 072	3	Duits
	BL	Basel-Landschaft	1501/1833	Liestal	283 421	518	502	86	Duits
	SH	Schaffhausen	1501	Schaffhausen	79 417	298	246	27	Duits
	AR	Appenzell-Ausserrhoden	1513	Herisau	54 064	243	220	20	Duits
	AI	Appenzell-Innerrhoden	1513	Appenzell	15 854	173	87	6	Duits
	SG	St. Gallen	1803	St. Gallen	495 824	2 026	222	85	Duits
	GR	Groubunderland	1803	Chur	195 886	7 105	26	180	Duits, Romansch, Italiaans
	AG	Aargau	1803	Aarau	645 277	1 404	388	220	Duits
	TG	Thurgau	1803	Frauenfeld	263 733	991	229	80	Duits
	TI	Ticino	1803	Bellinzona	350 363	2 812	110	157	Italiaans
	VD	Vaud	1803	Lausanne	761 446	3 212	188	339	Frans
	VS	Valais	1815	Sion	331 763	5 224	53	143	Frans, Duits
	NE	Neuchâtel	1815/1857	Neuchâtel	177 327	803	206	53	Frans
	GE	Genève	1815	Geneva	482 545	282	1 442	45	Frans
	JU	Jura	1979	Delémont	72 410	839	82	64	Frans
	CH	Switserland		Bern	8 237 666	41 285	174	2 596	Duits, Frans, Italiaans, Romansch

Die tweeletter-afkortings vir Switserse kantonne word dikwels gebruik, bv. op voertuignommerplate.

Die term "kanton" is vir die eerste keer in 1475 in ´n dokument van die stad Freiburg gebruik. Oorspronklik het elke kanton van die Switserse Federasie 'n selfregerende en onafhanklike politieke eenheid gevorm, wat oor sy eie geldeenheid en leër beskik het. Die huidige federale struktuur dateer uit die jaar 1848.

In die 16de eeu het die Switserse Konfederasie uit dertien selfregerende kantonne bestaan: Ses sogenaamde woudkantonne en sewe sogenaamde stedelike kantonne. Hulle het formeel deel uitgemaak van die Heilige Romeinse Ryk van die Duitse Nasie, tog was hulle ná hul oorwinning oor die Duitse keiser Maximiliaan in 1499 feitlik onafhanklik.

Die ses woudkantonne was demokratiese republieke, terwyl die sewe stedelike kantonne, waaronder Zürich, Bern en Basel, deur stadsrade geregeer is. Hierdie stadsrade is egter deur klein oligargieë van patrisiërs (welvarende burgers) en die guldes oorheers.