Hugh Abercrombie

Hugh Abercrombie
Geboorte	7 Mei 1872 Cardiff
Sterfte	12 Julie 1955 Nelspruit
Nasionaliteit	Suid-Afrika
Beroep	Sakeman, verslaggewer, skrywer, boer

Hy het sy opvoeding ontvang aan die St. Mary's College in Dulwich en na Suid-Afrika gekom in 1887 as 'n stenograaf en boekhouer. Hy het hom in Pretoria gaan vestig en kort voor lank aktief begin deelneem aan die plaaslike sakewêreld, politiek, sport en landbou-organisasies. Later jare het hy gaan boer by Nelspruit.

Abercrombie het in 1894 'n uitval met pres. Paul Kruger gehad oor die stemregvraagstuk en kommandodiens. Toe die party Het Volk egter opgerig word, het hy hom daarby aangesluit en in die verkiesing van 1907 hom in die kiesafdeling Troyeville verkiesbaar gestel nadat hy hom aan die veilige kiesafdeling Wakkerstroom onttrek het ten gunste van genl. Jan Smuts.

Abercrombie het oor verskeie onderwerpe geskryf wat op Suid-Afrika betrekking het, was 'n ruk lank die eienaar van twee pennie-koerante, wat albei Chronicle geheet het, een in Pretoria en daarna een in Johannesburg. Heelwat later was hy stigter, eienaar en redakteur van die onafhanklike politieke maandblad White Africa, wat van 1948 tot 1955 uitgegee is. Hy het ook gedien as president van die Transvaalse Landbou-unie en die Pretoriase Sakekamer.

Sy skryfwerk sluit in: The rise and fall of Krugerism in samewerking met John Scoble (1900), Africa's peril; the colour problem (1938), Afrika se gevaar; die kleurprobleem (1938), The world to come, the seven pillars of federation (1942), The secret history of South Africa or: Sixty-five years in the Transvaal (1951).

• Potgieter, D.J. (hoofred.) Standard Encyclopaedia of Southern Africa. Kaapstad: Nasionale Opvoedkundige Uitgewery Ltd., 1973.