Henry Barber

Die dorp Barberton is na hom en sy broer genoem.

Barber was die jongste seun van Frederick William Barber en sy vrou, Mary Elizabeth Bowker. Nadat hy tuis onderrig is, sluit Barber hom in 1870 by sy broer Frederick Hugh Barber op die diamantvelde van Griekwaland-Wes aan, waar hy aansienlike sukses behaal, veral by die Colesberg-koppie. Aangesien hy 'n goeie jagter, 'n uitmuntende skut (hy het die veelgesogte Wimbledon-penning verower) en 'n geesdriftige natuurkenner was, doen hy later mee aan sy broer se jagtogte in die Kalahari en Matabeleland, waar hy tydens sy reise verskeie nuwe soorte vlinders ontdek het, wat later na hom genoem is.

Gedurende die jare 1873–'74 verken hy die streke Waterberg en Soutpansberg en later (1876) besoek hy Matabeleland. Eenkeer word hy deur 'n buffel by die Gwaairivier gegaffel waarna sy broer hom drie maande lank sonder hulp verpleeg. In 1884 ontdek Barber en sy broer Fred winsgewende gouderts op staatsgrond in die De Kaap-vallei in die indertydse Oos-Transvaal en die dorp Barberton word na hulle genoem.

Toe goud aan die Witwatersrand ontdek word, vergesel hy sy broer na dié gebied waar hulle die eerste skag op die Rand grawe en by die stigting van die Ferreira-mynmaatskappy betrokke is. Barber word ook 'n direkteur van die Delagoabaai-beleggingsmaatskappy. In 1912 emigreer hy na Kenia, waar hy verskeie plase koop en koffie op groot skaal aanplant.

Barber was 'n ywerige sportman en 'n geharde pionier met 'n wye kennis van suidelike Afrika en bedeeld met 'n gesellige, selfstandige en vreeslose geaardheid, volgens J.T. Leverton in die Suid-Afrikaanse Biografiese Woordeboek.

Hy trou in 1894 met Mary Layard Bowker en hulle het vier seuns, van wie Ivan Mitford-Barberton, die beeldhouer, in Houtbaai gewoon het. In 1916 verander hy sy van na Mitford-Barberton.

• (af) Krüger, prof. D.W. (hoofred. tot 1972) en Beyers, C.J. (hoofred. sedert 1973). 1977. Suid-Afrikaanse Biografiese Woordeboek. Kaapstad: Tafelberg-Uitgewers, namens die Raad vir Geesteswetenskaplike Navorsing.
• (en) Biografie van Barber. URL besoek op 5 Mei 2016.