Godheid

Gode word soms beskou as wesens wat op die aarde lewe, met name van die natuurelemente, of in die hemel of ’n onderaardse wêreld.

In sommige gelowe word net een god aanbid (monoteïsme), soos die Christendom, Islam en die Jodedom, en in ander gelowe is daar meer as een god (politeïsme), soos in die Griekse en Romeinse mitologie en Hindoeïsme.

Henoteïstiese gelowe aanvaar een opperste god, maar ontken nie die bestaan van ander gode nie en beskou hulle as aspekte van dieselfde goddelike beginsel.

Hoewel die meeste monoteïstiese gelowe hulle god as alomteenwoordig en vir ewig beskou, is dit nie noodsaaklik in die definisie van ’n "godheid" nie. Verskeie kulture stel hulle gode anders voor. Monoteïstiese gelowe verwys gewoonlik na hulle god in manlike terme, terwyl ander gelowe op verskeie maniere na hulle gode verwys – manlik, vroulik of sonder geslag.

Histories het baie antieke kulture, insluitende dië van Mesopotamië, Antieke Egipte, Antieke Griekeland en die Antieke Romeine, natuurverskynsels vergoddelik. Sommige gode, soos die Vediese gode, is as etiese begrippe beskou. In Indiese gelowe is gode beskou as manifestasies binne die tempel van elke lewende wese se liggaam, soos sintuiglike organe en die siel.

• Wiki Afrikaans  Wiki Commons het meer media in die kategorie Godheid.