Gereformeerde Kerk Venterstad

Dit het vroeër as Ventersburg bekendgestaan, maar die naam is verander om verwarring met die Vrystaatse Ventersburg te voorkom.

Gereformeerde kerk Venterstad
Sluit in	Venterstad
Klassis	Burgersdorp
Huidige predikant(e)	Frikkie Deysel
In kombinasie met	Lyciumville
Belydende lidmate	75
Dooplidmate	4
Adres	H.v. Kruger- en Van Wykstraat Venterstad Oos-Kaap
Geskiedenis
Stigtingsdatum	16 Junie 1875
Afgestig van	Burgersdorp
Eerste predikant	W.J. Snyman (1876–1913)

 

In 1874 het die kerkraad van Burgersdorp 'n versoekskrif van 'n aantal lidmate behandel wat gevra het dat die kerkraad die stigting van 'n nuwe dorp op Karreefontein moes ondersteun. Die kerkraad het blykbaar nie kans gesien om so kort ná Steynsburg alweer 'n groep lidmate te verloor nie en het gevolglik nie dadelik sy medewerking geskenk nie. 'n Paar jaar later is die kerkraad egter in kennis gestel dat 'n nuwe dorp aldaar gestig is en dat 'n aantal erwe al verkoop is en dat die komitee besluit het om sewe erwe te skenk aan die Gereformeerde Kerk vir 'n pastorie en 'n kerkgebou en verder is die hoop uitgespreek dat daar spoedig 'n gemeente gestig sou word.

Toe sake reeds sover gevorder het, kon die kerkraad dit nie meer keer nie en toe die lidmate in daardie buurt ook om afstigting gevra het, het die kerkraad daartoe ingestem, sodat die nuwe gemeente van Venterstad op 16 Junie 1875 gestig is. Ds. Dirk Postma het die kerkgebou wat vandag nog in gebruik is, se hoeksteen op 19 Augustus 1876 gelê. Dié gebou is 'n nasionale gedenkwaardigheid.

Die dorp se wit bevolking het tussen die sensus van 2001 en dié van 2011 afgeneem van 139 tot 41. Dat die gemeente nie 'n ooreenstemmende daling ervaar het nie, kan waarskynlik daaraan toegeskryf word dat die meeste lidmate op omliggende plase of op die dorpie Oviston woon, waarvan die wit bevolking in dié tyd van 201 tot 250 toegeneem het. Oviston is 14 km van Venterstad af geleë. Nadat die plaaslike NG gemeente se getal belydende lidmate in 2015 tot sowat 50 gedaal het, het Venterstad se Gereformeerde kerk die enigste in die Oos-Kaap geword met meer lidmate as die plaaslike NG gemeente.

1. Willem Jacobus Snyman, 1877 - 1913
2. Derk Rumpff, 1914 - 1920
3. Pieter Willem Bingle, 1921 tot 8 Maart 1923 (oorlede in die amp)
4. Jan Hendrik Boneschans, 1923 - 1926
5. Dr. Willem Jacobus Snyman, 1927 - 1944 (sy oupa was die eerste predikant en sy vader dr. Flippie Snyman van Steynsburg)
6. Ds. Izak David Krüger, 1945 - 1949
7. Nicolaas Tjaart Snyman, 1949 tot 1 Julie 1951 (oorlede in die amp)
8. Ernst Walter Meyer, 1953 - 1955
9. Willem Johannes Jacobus du Plessis, 1957 - 1967
10. Aubrey George de Leeuw, 1962 - 1968
11. Jan Louis Ras, 1967 - 1971
12. Jacobus Daniël Venter, 1972 - 1977
13. Theron Krüger, 1978 - 1982 (in kombinasie met Colesberg)
14. Daniël Jacobus de Kock, 1983 - 1987
15. Jan Lion Cachet, 1988 - 1996
16. Coenraad Christoffel Andries Vrey, 1997 - 2000 (in kombinasie met Lyceumville)
17. Jan Hendrik Venter, 2001 – 2017
18. Myburgh, L.D. (Daniël), 2018 – 2023
19. Deysel, Frikkie, 24 Februarie 2024 – hede

•  
  Ds. Dirk Postma het die hoeksteen van die Gereformeerde kerk op Venterstad op 19 Augustus 1876 gelê, skaars 'n jaar ná die gemeente se stigting.
•  
  Ds. W.J. Snijman as jong man
•  
  Ds. W.J. Snijman in sy middeljare
•  
  Ds. W.J. Snijman was Venterstad se leraar van 1877 tot 1913.
•  
  Ds. Derk Rumpff, leraar van 1914 tot 1920.
•  
  Ds. Pieter Willem Bingle, 1921 tot sy dood op 8 Maart 1923.
•  
  Ds. Jan Hendrik Boneschans, leraar van 1923 tot 1926.
•  
  Ds. (later prof.) W.J. Snyman, leraar van 1927 tot 1944, kleinseun van die eerste leraar.
•  
  Ds. Izak David Krüger, leraar van 1945 tot 1949.
•  
  Ds. Walter Meyer (4 September 1920 – 3 Augustus 1998) en sy gesin. Hy was die leraar van 1953 tot 1955.
•  
  Ds. W.J.J. du Plessis, leraar van 1957 tot 1967.
•  
  Ds. Daniël en Roné Myburgh by ds. Jan en Nerina Venter tydens eersgenoemde se bevestiging.
•  
  Ds. Daniël Myburg en sy vrou, Roné, is op 10 Februarie 2018 in die gemeente verwelkom.
•  
  Ds. Daniël en Roné Myburgh by die predikante wat aan sy handeoplegging deelgeneem het. Van links: Neels Malan, Jan Venter, Jaco Cronjé, Jan Malan, Louw Badenhorst, Woud ten Haaf.

• (af) Jooste, prof. dr. J.P. Jooste: "Oorsig van die geskiedenis van die Gereformeerde Kerk Burgersdorp". In: Die Gereformeerde Kerk, Burgersdorp. Gedenkalbum by geleentheid van die Eeufees 22-24 Januarie 1960. Burgersdorp: Kerkraad van die Gereformeerde kerk.
• (nl) Maeder, ds. G.A. en Zinn, Christian. 1917. Ons Kerk Album. Kaapstad: Ons Kerk Album Maatschappij Bpkt.