Gereformeerde Kerk Hofmeyr

Gereformeerde kerk Hofmeyr
Sluit in	Hofmeyr, Oos-Kaap
Klassis	Burgersdorp
Adres	Piet Retiefstraat Hofmeyr
Geskiedenis
Stigtingsdatum	1914
Afgestig van	Steynsburg
Eerste predikant	Dr. S.J. van der Walt (1930–1941, in kombinasie met Molteno)
Datum ingelyf	1995
Ingelyf by	Steynsburg

In dieselfde streek het hierdie lot ook die gemeentes Elliot (1899–1979, saamgesmelt met Maclear), Indwe (1926–1990), Sterkstroom (1882-2002), Noupoort (1950–2002) en Jamestown getref, terwyl die oorblywende gemeentes almal ’n skerp afname in hul lidmaattal ervaar het: Middelburg (296 belydende lidmate einde 1958 tot 121 einde 2014), Burgersdorp (481 tot 131), Aliwal-Noord (347 tot 157), Dordrecht (156 tot 36), Barkly-Oos (131 tot 27), Steynsburg (375 tot 42), Venterstad (182 tot 62), Maclear/Elliot (131 tot 58) en Molteno (108 tot 31).

Die Gereformeerde kerk Hofmeyr het in 1914 van Steynsburg afgestig en vyf jaar later was hier 125 lidmate. ’n Beskeie kerkie is gebou en in stand gehou. Nadat die gemeente se lidmaattal tot net agt gedaal het weens die ontvolking (in werklikheid ontblanking) van die Noordoos-Kaap, het die kerkraad in 1995 besluit om te ontbind en weer ’n wyk van Steynsburg te word. Die kerkgebou in Piet Retiefstraat is verkoop, maar die geskiedkundige meublement het behoue gebly, want dis hergebruik in die kerkgebou op Bredasdorp, waar die Gereformeerde kerk Agulhas in 2006 tot stand gekom het.

Omdat die gemeente altyd klein was, kon hy in sy meer as 80 jaar lange bestaan nooit ’n eie predikant beroep nie. Die volgende predikante het verantwoordelikheid vir Hofmeyr aanvaar naas hul pligte in hul eie gemeente (tussen hakies aangedui):

1. Van der Walt, dr. Stephanus Johannes, 1930–1941 (Molteno)
2. Lessing, Izak Jacobus, 1942–1948 (Molteno)
3. Du Plessis, Alwyn Johannes, 1958–1960 (Steynsburg, 1958–1961)
4. Van der Walt, Hendrik Jacob, 1960–1962 (Oudtshoorn)
5. Van der Walt, Josef Cornelis, 1965–1967 (Molteno)
6. Wijnbeek, Dirk Hendrik Petrus, 1983–1995 (Steynsburg)

• (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Aministratiewe Buro.
• (af) Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
• (af) Venter, ds. A.A. 1957. Almanak van die Gereformeerde Kerk in Suid-Afrika vir die jaar 1958. Potchefstroom: Administratiewe Buro.
• (af) Vogel, Willem (red.). 2014. Die Almanak van die Gereformeerde Kerke in Suid-Afrika vir die jaar 2015. Potchefstroom: Administratiewe Buro.

• Ds. Chris Hattingh, 'n boorling van Hofmeyr
• NG gemeente Hofmeyr