Gereformeerde Kerk Bethlehem

Die gemeente was einde 2001 die grootste in die Klassis Ladybrand toe dit 304 belydende en 114 dooplidmate gehad het. Einde 2014, nadat die klassis se naam verander is na Oos-Vrystaat, het Bethlehem 253 belydende en 48 dooplidmate gehad, die tweede grootste gemeente in die klassis naas Frankfort.

Gereformeerde kerk Bethlehem
Sluit in	Bethlehem Clarens Golden Gate Paul Roux
Denominasie	Gereformeerd
Klassis	Oos-Vrystaat
Huidige predikant(e)	A.L. (Abri) Pelser
Belydende lidmate	249
Dooplidmate	48
Adres	H.v. Cambridge- en Wesselstraat Bethlehem
Geskiedenis
Stigtingsdatum	24 April 1920
Afgestig van	Lindley
Eerste predikant	A.L. Aucamp (1937–'42)

Op 9 Maart 1911 het die Gereformeerde Kerk by die munisipaliteit van Bethlehem aansoek gedoen om ’n erf sodat ’n kerkgebou opgerig kon word. Op daardie tydstip kon die munisipaliteit nie aan die versoek voldoen nie en is die Gereformeerde Kerk aangeraai om later weer aansoek te doen. Vanaf Augustus 1912 is een van die vertrekke in die stadsaal Sondagoggende vir ’n Gereformeerde diens afgestaan.

Voor 1920 het die Gereformeerdes wat in Bethlehem en omstreke gewoon het, onder Ladybrand as ’n wyk geressorteer en is hulle ook deur ds. H. Ph. J. Pasch vanaf Ladybrand bedien. Op 29 Augustus 1917 reeds het ds. Pasch die hoeksteen van die eerste kerkie gelê. Dit was ’n rooibaksteengebou op dieselfde plek waar die huidige kerk staan. Dié kerkie het £1 700 gekos en is kontant gebou, hoewel die lidmatetal toe maar 23 was.

Die Gereformeerde kerk Bethlehem het op 24 April 1920 van die Gereformeerde kerk Lindley (gestig in 1913) afgestig en dadelik in kombinasie met dié gemeente getree sodat die predikante van Lindley ook die Bethlehemse gemeente kon bedien. So het di. D.G. Venter, W.J. Snyman en Pasch agtereenvolgens ook op Bethlehem eredienste waargeneem.

By afstigting het Bethlehem uit 92 belydende lidmate bestaan, maar verbasend vinnig geroei, want tot ds. A.L. Aucamp van die Gereformeerde kerk Eldoret, Kenia, die beroep in 1937 as die gemeente se eerste vaste predikant aanneem, was hier reeds 342 belydende en 322 dooplidmate. Destyds het Bethlehem ook Reitz (afgestig in 1941) en Harrismith (afgestig in 1938) ingesluit.

Ná hom het ds. J.L. de Bruin (1943-1949) die gemeente bedien. ’n Nuwe kerkgebou en ’n nuwe pastorie is onder sy leiding opgerig. Van 1951 tot 1954 het ds. H.J. Kruger hom opgevolg. Tydens die bediening van. ds. Jan Visser is die kerkgebou vergroot en ook ’n toring aangebou. Ds. W. de Vos is in Januarie 1960 bevestig. Toe was die sieletal van die gemeente is tans 413, van wie 235 belydende en 178 dooplidmate was.

Bethlehem se kerkgebou is in 1947 opgerig. Ds. J.L. de Bruin het die hoeksteen op 4 Mei 1946 gelê. Die bouaannemer was Japie Maree en Seun, maar die argitek word nie op die steen vermeld nie. Die kerkgebou is in 1958 vergroot (die gemeente het weens die twee afstigtings toe net 190 belydende en 142 dooplidmate gehad), en die kerksaal is agt jaar later langs die kerk opgerig. Ds. Jan Visser het 'n nuwe gedenksteen op 18 Oktober 1958 onthul. Die bouaannemer van die vergroting was Martin Harris en Seuns.

1. Aucamp, Abraham Liebrecht, 1937 – 1942
2. De Bruin, Johannes Lodewicus, 1943 – 1949
3. Krüger, Hendrik Jacobus, 1951 – 1954
4. Visser, dr. Jan, 1956 – 1959
5. De Vos, Wouter, 1960 – 1965
6. Postma, Dirk, 1966 – 1972
7. Laubscher, Nicolaas Gerhardus, 1973 – 1977
8. Schalekamp, dr. McDonald Etienne, 1978 – 1981
9. Van der Walt, Pieter Johannes, 1982 – 2008 (aanvaar sy emeritaat).
10. Pelser, Abraham Liebrecht, 2009 – hede

•  
  Ds. Abraham Liebrecht Aucamp, leraar van 1937 tot 1942.
•  
  Ds. en mev. J.L. de Bruin, die leraarspaar van 1943 tot 1949.
•  
  Mev. (ds.) J.L. de Bruin (gebore Benonie [of Benomi] du Plessis), predikantsvrou van 1943 tot 1949.
•  
  Ds. Jan Visser, die leraar van 1956 tot 1959.
•  
  Ds. Wouter en mev. Ester de Vos, die predikantspaar van 1960 tot 1965.
•  
  Ds. Dirk Postma, leraar van 1966 tot 1972, sy tweede gemeente.
•  
  Ds. Pieter van der Walt, leraar van 1982 tot 2008 (sy laaste gemeente), as eerstejaarstudent aan die PU vir CHO in 1965 toe hy die Abe Bailey-beurs gewen het.

• (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
• (af) Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
• (af) Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
• (af) Venter, ds. A.A. (hoofred.) 1957. Almanak van die Gereformeerde Kerk in Suid-Afrika vir die jaar 1958. Potchefstroom: Administratiewe Buro.
• (af) Venter, ds. A.A. (hoofred.) 1958. Almanak van die Gereformeerde Kerk in Suid-Afrika vir die jaar 1959. Potchefstroom: Administratiewe Buro.
• (af) Vogel, Willem (red.). 2014. Die Almanak van die Gereformeerde Kerke in Suid-Afrika vir die jaar 2015. Potchefstroom: Administratiewe Buro.

• NG gemeente Bethlehem

• (af) Die gemeente se webtuiste Geargiveer 17 Desember 2015 op Wayback Machine. URL besoek op 14 Desember 2015.
• (en) Die Gereformeerde kerk Bethlehem, soos te sien op Google Maps. URL besoek op 14 Desember 2015.