Ernst De Jong

Hy is bekend as die persoon wat die diere op die Suid-Afrikaanse banknote geskilder het.

Suid-Afrika se eerste banknote het die afbeelding van Jan van Riebeeck, die eerste Nederlandse goewerneur van die Kaap die Goeie Hoop, gedra. In die 1980’s is die note herontwerp met afbeeldings van inheemse diere, soos die renoster, olifant, leeu, buffel, luiperd, ens. De Jong was vir hierdie ontwerpe verantwoordelik.

Hy het ook sy Springbokkleure verwerf in sierduik (3 m) in 1960 en later ’n duikafrigter geword.

De Jong is in Pretoria gebore, waar hy ook sy skoolopleiding ontvang het. ’n Sportbeurs wat aan hom toegeken is, het hom in staat gestel om na Amerika te gaan, waar hy vier jaar se opleiding aan die kunsskool van die Universiteit van Oklahoma ontvang het en ’n graad in Beeldende Kuns aan hom toegeken is. Daar het hy onder John O’Neill, Eugene Baninger en Emilio Amero gestudeer. Ernst de Jong het in 1958 na Suid-Afrika teruggekeer en was tot in 1961 lektor in inligtingontwerp aan die Pretoriase Tegniese Kollege. Hy bied eenmantentoonstellings in Pretoria (1958, 1961, 1965, 1966), Johannesburg (1960, 1964, 1966) en Milaan (1964) aan, en neem ook deel aan verskeie groeptentoonstellings.

Hy besit ’n reklame-ontwerpateljee in Pretoria, waar hy ontwerpe maak vir nywerhede, uitstallings, advertensies, films en posseëls. Sy openbare opdragte sluit verskeie grafiese werke vir onder meer die Transvaalse Provinsiale Administrasiegebou in Pretoria en die Kernnavorsingsentrum by Pelindaba in. Van sy werk is in die Museum vir Skone Kuns in Oklahoma en in Johannesburg en Pretoria ten toon gestel, en is ook in besit van die Schlesinger-organisasie en die Rembrandt-kunsstigting.

• Suid-Afrikaanse Rand

• Brosjure van die Republiekfees 1966 • Kunsuitstallings in amptelike opdrag gereël deur die Suid-Afrikaanse Kunsvereniging

• Wêreldspektrum, 1982, ISBN 0-908409-53-2 band