Kiesafdeling Durban-Noord

In die heel eerste verkiesing in 1938 in Durban-Noord, toe daar 6 546 kiesers geregistreer het, kom die Arbeidersparty se C.F. Miles-Cadman teen die Verenigde Party se A.H.J. Eaton te staan. Miles-Cadman wen met 'n meerderheid van 1 617 stemme. Hy wen weer in 1943 met 'n meerderheid van 3 444 teen die onafhanklike S.M. Petterson. In 1948, toe die getal kiesers aangegroei het tot 9 688, wen die Verenigde Party se J. Lewis die setel met 'n meerderheid van 2 235 teen J.J. Smith van adv. Tielman Roos se Sentrale Party, die sogenaamde Roosiete. Lewis wen weer in 1953, dié keer teen die Nasionale Party se F.J. du Toit, met 'n reuse-meerderheid van 8 503. In 1958 word hy onbestrede verkies en in die volkstemming van 1960 oor republiekwording stem net 1 282 vir 'n republiek en 11 426 daarteen.

In die verkiesing van die volgende jaar wen M.L. Mitchell van die V.P. met 'n meerderheid van 2 176 stemme teen die Progressiewe Party se G.R. Bond. Mitchell kom in 1966 te staan teen G.J. Claassen van die N.P., R.B. Brink van die P.P. en G.E. Yeatman van die Front en wen met 'n meerderheid van 3 339. Hy word dan ook in 1970 en in 1974 onbestrede verkies in wat toe een van die veiligste V.P.-setels in die land was. Op 5 Mei 1976 behaal die Progressiewe Reformiste Party egter sy eerste oorwinning by die stembus toe S.A. Pitman (4 243 stemme) net 'n skrale meerderheid van 324 wen teen die V.P. se W.B. Reynolds (3 919 stemme), dr. Denis Worrall van die N.P. (3 139) en die onafhanklike M.S. Louw, wat net 95 stemme kon kry. In die 1977-verkiesing wen Pitman vir die Progressiewe Federale Party in Pinetown, terwyl R.B. Miller Durban-Noord vir die Nuwe Republiek Party wen.

• 1938 - C.F. Miles-Cadman van die Arbeidersparty
• 1943 - C.F. Miles-Cadman van die Arbeidersparty
• 1948 - J. Lewis van die Verenigde Party
• 1953 - J. Lewis van die Verenigde Party
• 1958 - J. Lewis van die Verenigde Party (onbestrede)
• 1961 - M.L. Mitchell van die Verenigde Party (onbestrede)
• 1966 - M.L. Mitchell van die Verenigde Party
• 1970 - M.L. Mitchell van die Verenigde Party
• 1974 - M.L. Mitchell van die Verenigde Party (onbestrede)
• 1977 - R.B. Miller van die Nuwe Republiek Party

• Schoeman, B.M. 1977. Parlementêre verkiesings in Suid-Afrika 1910-1976. Pretoria: Aktuele Publikasies.
• Amptelike Jaarboek van die Republiek van Suid-Afrika 1983. 1983. Johannesburg: Chris van Rensburgpublikasies.