Die As

Hierdie toetsreeks word sedert 1882 elke twee jaar afwisselend in die twee lande gehou. Krieket is ’n somersport en as gevolg van die verskil in halfronde word die wedstryde effektiewelik elke agtien of dertig maande aangebied. Dit is een van krieket se internasionale kompetisies met die meeste wedywering.

Die As
2025–26
Die urn wat die as bevat, by die MCC-museum op Lord’s; ’n replika word aan die kaptein van die wenspan oorhandig.
Sportsoort	Toetskrieket
Gestig	1882–83
Eienaar	Internasionale Krieketraad
Inwydingseisoen	1882–83
Deelnemende lande	Australië Engeland
Aantal spanne	2
Mees onlangse kampioen	Australië (2023)

Op hierdie oomblik bestaan Die As uit vyf toetswedstryde van twee beurte per land. In die winter van 2013–14 is die reeks net enkele maande ná die vorige reeks gehou, sodat die vierjaarlikse wedstryd in Australië nie met die Krieketwêreldbeker 2015 sou saamval nie. Die 2019-reeks in Engeland is net enkele weke ná die Krieketwêreldbeker 2019 gehou, wat deur Engeland gewen is.

Die naam het sy oorsprong in ’n kammakastige “doodsberig” wat in 1882 in ’n destydse Britse koerant, The Sporting Times, verskyn het. Daarin is Engeland se destydse krieketnederlaag teen Australië op die beroemde Londense krieketveld die Oval spottenderwys as die dood van Engelse krieket voorgestel. Die koerant het geskryf dat “Die lyk sal veras en die as na Australië geneem word”. Joernaliste het nie op hulle laat wag nie en het die daaropvolgende Engelse toer na Australië as die stryd om die “As” te herwin beskryf (The quest to regain The Ashes). Ten tye van die toer is ’n kleinerige urn, wat as van ’n onsekere herkoms bevat, deur ’n groep vroue van Melbourne in Australië, aan die besoekende Engelse krieketkaptein oorhandig. Hierdie urn kan in die MCC Museum op die Lord’s Krieketgronde in Londen besigtig word.

 

 

 

 

 

Algeheel

• (en) "Ashes". Encyclopædia Britannica. Besoek op 1 Augustus 2023.
• (en) Cricinfo se Ashes-webwerf