Dante Alighieri: Italiaanse digter van Florence

Sy meesterstuk, die Goddelike Komedie (aanvanklik Comedìa), word die beste letterkundige werk in Italiaans en een van die beste klassieke werke ter wêreld genoem. Dit bestaan uit drie dele: Inferno, Purgatorio en Paradiso.

Dante Alighieri
Dante deur Sandro Botticelli, 1495.
Gebore	Durante di Alighiero degli Alighieri Middel Mei tot middel Junie ca. 1265 Florence, Italië
Sterf	9 September 1321 Ravenna, Italië
Nasionaliteit	Italiaans
Beroep	Staatsman, digter, taalteoretikus

Dante is bekend daarvoor dat hy die gebruik van die omgangstaal in letterkunde gevestig het in 'n tyd toe gedigte meestal in Latyn geskryf is en net toeganklik vir opgevoede lesers was. Sy gebruik van die dialek van Florence vir werke soos La Vita Nuova (1295) en Comedia het gehelp om die moderne gestandaardiseerde Italiaans te vestig. Deur sy gedigte in die Italiaanse omgangstaal te skryf, eerder as in Latyn, het Dante letterkundige ontwikkeling beïnvloed en Italiaans vir verskeie eeue die letterkundige taal van Wes-Europa gemaak. Sy werk het 'n presedent geskep vir belangrike latere Italiaanse skrywers soos Francesco Petrarca en Giovanni Boccaccio.

Dante was instrumenteel in die vestiging van letterkunde in Italië en word beskou as een van die land se nasionale digters en die Weste se letterkundige ikone. Sy beskrywings in Inferno, Purgatorio en Paradiso was die inspirasie vir 'n groot deel van die Westerse kuns en letterkunde.

Dante is tussen 14 Mei en 13 Junie 1265 gebore. Sy doopnaam was vermoedelik Durante. Hy is gebore in die prominente en invloedryke Alighieri-familie van Florence, wat die pouslike regte gesteun het. Om deel te neem aan die openbare lewe moes 'n burger van Florence een van die kunste bemeester — sodoende het Dante 'n dokter geword. In die volgende paar jaar het Dante se naam gereeld na vore gekom waar hy die publiek toegespreek het of in die republiek gestem het.

Daar is nie veel bekend oor Dante se opvoeding en onderrig nie. Hy het vermoedelik tuisonderig ontvang. Wat wel bekend is, is dat Dante Toskaanse gedigte bestudeer het.

Op agtienjarige ouderdom ontmoet Dante vir Guido Cavalcanti, Lapo Gianni, Cino da Pistoia en Brunetto Latini en saam het hulle die leiers van 'n nuwe styl in die digkuns geword genaamd Dolce Stil Novo (Die soet nuwe styl). Brunetto is later in Dante se Komedie genoem (Inferno XV, 82). In later jare het Dante filosofie en teologie bestudeer.

• Wiki Afrikaans  Wiki Commons het meer media in die kategorie Dante Alighieri.

• Wiki Afrikaans  Wikiquote het aanhalings deur Dante Alighieri.

•   Hierdie artikel is in sy geheel of gedeeltelik uit die Engelse Wiki vertaal.