Oorgangsmetaal

Daar word onderskei tussen:

• die 3d-oorgangsmetale van skandium tot sink
• die 4d-oorgangsmetale van yttrium tot kadmium
• die 5d-oorgangsmetale van lantaan tot kwik
• die 6d-oorgangsmetale van aktinium tot copernicium

In hierdie blok raak die d-orbitale opgevul. Daar vind 'n oorgang van valenselektrone na kernelektrone plaas: in die blok se eerste kolomme kan alle d-elektrone as valenselektrone optree. 'n Element soos vanadium het daardeur 'n hoogste oksidasietoestand van 5+, hoewel dit ook laer toestande soos 4+, 3+ or 2+ kan vertoon, waar net 'n deel van die d-elektrone as valenselektron optree. Omrede die afskerming van die kernlading deur die d-elektrone wat opgevul raak nie effektief is nie, word die energie van die d-orbitale geleidelik laer. In die tweede helfte van die blok kan nie alle d-elektrone meer as valenselektrone optree nie. Byvoorbeeld osmium wat 6 d-elektrone en 2 s-elektrone het vorm Os(VIII)-verbindings soos OsO₄ maar yster wat in dieselfde groep behoort is gewoonlik Fe(II) of Fe(III) hoewel dit soms Fe(VI) kan bereik, maar nie Fe(VIII) nie. Aan die einde van die blok, soos by sink, word die volle d-skil eintlik kernelektrone en die element vorm net Zn(II) deur sy s-elektrone te verloor. By die elemente van die p-blok wat volg, soos gallium ens. kan die d¹⁰-skil as kernektrone beskou word en neem nie aan chemiese wisselwerkings deel nie.

Legenda

• Wiki Afrikaans  Wiki Commons het meer media in die kategorie Oorgangsmetaal.
•   Wikiwoordeboek het 'n inskrywing vir oorgangsmetaal.