Camp David
Camp David is die nie-amptelike, maar mees gebruikte benaming vir die Naval Support Facility Thurmont, 'n landelike rusplek en vakansiehuis vir die President van die Verenigde State van Amerika en sy gaste.
Die Camp David-ooreenkoms, wat vrede tussen Egipte en Israel bewerkstellig het, is in 1979 hier onderteken.
Die rusplek, wat sowat 100 kilometer noord-noordwes van die hoofstad Washington, DC in 'n laagliggende, heuwelagtige en beboste gebied in die Catoctin Mountain Park geleë is, is streng gesproke 'n militêre instelling wat hoofsaaklik deur lede van die Amerikaanse Vloot en die Amerikaanse Marinierskorps beman word. In administratiewe opsig maak dit deel uit van die nie-geïnkorporeerde Frederick County in die deelstaat Maryland en is dit naby die naamgewende nedersetting Thurmont teen 'n hoogte van 560 meter bo seevlak geleë.
Die rusplek het vroeër as Hi-Catoctin bekend gestaan en is oorspronklik tussen 1935 en 1938 deur die Works Progress Administration (WPA) as 'n ruskamp vir federale regeringsagente en hul gesinne opgerig. In 1942 is die kamp deur president Franklin D. Roosevelt in 'n presidensiële rusplek omgeskep en – na aanleiding van die fiksionele paradys in die Himalajabergreeks – hernoem tot Shangri-La. Die huidige naam gaan terug op president Dwight D. Eisenhower wat die kamp ter ere van sy pa en kleinseun David genoem het.
Die rusplek is nie toeganklik vir die publiek nie. Om die privaatheid van die kamp te beskerm, maar ook om veiligheidsredes, word Camp David nie op die amptelike kaarte van die Catoctin Mountain Park aangedui nie.
Verwysings
Eksterne skakels
- Wiki Afrikaans
Wiki Commons het meer media in die kategorie Camp David.
77°27′52″W / 39.64694°N 77.46444°W
This article uses material from the Wikipedia Afrikaans article Camp David, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Inhoud is onderhewig aan CC BY-SA 4.0, tensy anders vermeld. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Afrikaans (DUHOCTRUNGQUOC.VN) is an independent company and has no affiliation with Wiki Foundation.