Bergrivier Plaaslike Munisipaliteit

Bergrivier Plaaslike Munisipaliteit
Provinsie	Wes-Kaap
Distriksmunisipaliteit	Weskus
Tipe	Plaaslike Munisipaliteit
Munisipale kode	WC013
Hoofstad	Piketberg
Grootste tale	Afrikaans, Xhosa, Engels
Area	4 407 km²
Bevolking	61 897 (2011)

Die munisipaliteit se naam is ontleen aan die rivier wat deur die munisipale gebied vloei en uitmond by Laaiplek. Die gebied is uitgestrek, met Piketberg die hoofdorp, wat 67 km van Velddrif, waar die grootste bevolkingskonsentrasie is, geleë is.

Volgens die sensus van 2011 was Bergrivier se bevolking 61 897. Hiervan was die oorgrote meerderheid Afrikaanssprekend (52 575), gevolg deur Xhosasprekendes (2 178) en Engelssprekendes (1 475). Laasgenoemde woon hoofsaaklik op Velddrif, Laaiplek en Port Owen, wat al drie toenemend gewild is as aftreeplek vir stedelinge. Minder as 1% van Bergrivier se bevolking is in die buiteland gebore, waarvan die meeste (274) in Suider-Afrika en die naasmeeste (134) in Europa gebore is. Die grootste rassegroep in die Bergriviergebied is bruinmense met 43 915 (71%) inwoners in 2011. Hulle word gevolg deur blankes met 10 456 (16,9%) en swartmense met 7 001 (11,3%). Daar was in 2011 net 256 Indiërs in die Bergriviergebied.

Die hoofdorpe van die munisipale gebied, wat saam met Saldanhabaai, Swartland, Cederberg en Matzikama onder die Weskus-distriksmunisipaliteit ressorteer, is Aurora, Dwarskersbos, Eendekuil, Laaiplek, Monte Bertha (die bruin woonbuurt van Porterville), Noordhoek (die bruin woonbuurt van Velddrif/Laaiplek), Piketberg, Porterville, Redelinghuys en Velddrif.

Die munisipale raad het in 2004 'n wapen by die Buro vir Heraldiek geregistreer: Geboë deurlopend kepersgewys verdeel van goud en blou, in die skildhoof regs 'n koringgerf, links 'n geblaarde druiwetros, en in die skildvoet twee skuinsgekruiste skimmelforelle alles van natuurlike kleur; op 'n blou skildhoof 'n skuinsgekruiste byl en spies van natuurlike kleur belaai met 'n rooi proteablom, silwer gesaad en groen geblaar. Die helmteken is 'n halwe rooi son uitkomend uit 'n goue muurkroon, en die wapenspreuk is "Deus est vita".

Hoërskole in die munisipale gebied is die Hoërskole Steynville (op Piketberg), Porterville, Piketberg en Velddrif (al drie gekombineerd). Die laerskole sluit in Redelinghuys, Eendekuil, Aurora (eintlik 'n middelbare skool) en die Primêre Skole Carl Schreve, Groenvlei, Brandenburg, Willemsvallei, Steynville en Redelinghuys.

Buiten klinieke op die meeste dorpe, is daar 'n hospitaal op Piketberg (Radie Kotze) en Porterville (LAPA Munnik).

Daar is polisiekantore op die volgende dorpe: Laaiplek, Eendekuil, Piketberg, Porterville en Redelinghuys. Aurora het in 2006 'n satellietstasie van Laaiplek gekry.

• Afbakeningsraad se webwerf Geargiveer 7 Oktober 2008 op Wayback Machine
• Statistieke SA se webwerf Geargiveer 17 April 2013 op Wayback Machine

	Provinsie Wes-Kaap
Hoofstad:	Kaapstad
Streke:	Kaapse Skiereiland | Kaapse Wynlande | Sentraal Karoo | Overberg | Tuinroete | Weskus
Grootste stede en dorpe:	Kaapstad | George | Mosselbaai | Knysna | Oudtshoorn | Paarl | Robertson | Stellenbosch | Swellendam | Vredenburg | Worcester
Munisipaliteite:	Beaufort-Wes | Bergrivier | Bitou | Breedevallei | Kaap Agulhas | Cederberg | Drakenstein | George | Hessequa | Kaapstad | Kannaland | Knysna | Laingsburg | Langeberg | Matzikama | Mosselbaai | Oudtshoorn | Overberg | Overstrand | Prins Albert | Saldanhabaai | Sentraal Karoo | Stellenbosch | Swartland | Swellendam | Theewaterskloof | Tuinroete | Weskus | Witzenberg