Anom-Lokvaloperasie: Internasionale lokvaloperasie tussen 2018 en 2021

ANOM is aanvanklik in die geheim versprei deur die Amerikaanse Federale Buro vir Ondersoek (FBI) en die Australiese Federale Polisie, waarna wetstoepassingsagentskappe in ander lande by die ondersoek aangesluit het.

In plaas daarvan om veilige kommunikasie toe te laat, was die program egter 'n trojaanse perd en het die wetstoepassers toegelaat om miljoene boodskappe met behulp van die toestelle en sagteware te onderskep. Dit het die polisie in 16 lande in staat gestel het om sake te bou teen honderde verdagtes wat na bewering betrokke was by kriminele aktiwiteite. Meer as 800 mense is in 16 lande inhegtenis geneem. Die FBI noem die operasie Operasie Trojan Shield en die Australiese Polisie noem dit Operasie Ironside.

 

Die Kanadese maatskappy Phantom Secure is in Maart 2018 gesluit. Hul veilige kommunikasiestelsel het dwelmhandelaars toegelaat om buite bereik van sekerheidsowerhede te kommunikeer. Met die sluiting van Phantom Secure het internasionale dwelmhandelaars 'n alternatiewe stelsel nodig gehad.

Sedert 2018 werk die FBI-tak in San Diego met 'n individu wat 'n "volgende generasie" geënkripteerde toestel ontwikkel het vir gebruik deur kriminele netwerke. Die persoon was op aanklag en het met die FBI saamgewerk in ruil vir 'n verminderde vonnis. Die individu het aangebied om ANOM te ontwikkel en dit dan aan misdadigers te versprei deur hul bestaande netwerke. Die eerste kommunikasietoestelle met ANOM is in Oktober 2018 aan drie voormalige verspreiders van Phantom Secure aangebied. Hierdie verspreiders was hoofsaaklik gekoppel aan misdadigers in Australië; op daardie stadium het die FBI die Australiese federale polisie betrek sodat hofbevele ingestel kon word om die toestelle wettig te monitor; dit laat nie toe dat die boodskappe buite Australië gedeel word nie, en die FBI het nie toegang tot die kommunikasie gehad nie.

Die FBI het ook met 'n derde (naamlose) land onderhandel om 'n kommunikasie-onderskepvermoë op te stel, maar gebaseer op 'n hofbevel wat die inligting aan die FBI kon oordra. Sedert Oktober 2019 word ANOM-kommunikasie vanaf hierdie derde land aan die FBI deurgegee.

 

Die ANOM-toestelle het bestaan uit 'n boodskapprogram wat op slimfone funksioneer, wat spesiaal aangepas is om normale funksies soos stemtelefonie, e-pos of lokasiedienste uit te skakel. Die boodskapprogramme wat op die telefone geïnstalleer is, word dan via vermoedelik veilige bedieners met mekaar geskakel.

Daar was ongeveer 50 toestelle in sirkulasie in Australië vir beta-toetsing vanaf Oktober 2018. Die onderskepkommunikasie het getoon dat elke toestel vir kriminele aktiwiteite gebruik is. Na 'n stadige begin het die verspreidingstempo van ANOM vanaf middel 2019 toegeneem. Teen Oktober 2019 was daar 'n paar honderd gebruikers. Teen Mei 2021 was daar 11 800 toestelle met ANOM geïnstalleer, waarvan ongeveer 9 000 in gebruik was. Nieu-Seeland het 57 gebruikers van die ANOM-kommunikasiestelsel gehad. Die Sweedse polisie het toegang tot gesprekke van 1600 gebruikers gehad, waarvan hulle hul fokus op 600 gebruikers toegespits het.

Die lokvaloperasie het op 8 Junie 2021 uitgeloop op deursoeklasbriewe wat gelyktydig regoor die wêreld uitgevoer is. Die agtergrond van die lokvaloperasie en die transnasionale aard daarvan is geopenbaar na die uitvoering van die lasbriewe. 'n Groot aantal arrestasies is uitgevoer, waaronder vermeende lede van die Australiese Italiaanse mafia, Albaniese georganiseerde misdaad, verbode motorfietsbendes, dwelmsindikate en ander misdaadgroepe. Meer as 800 mense is in 16 lande gearresteer.

In die Europese Unie is arrestasies deur Europol gekoördineer. Daar was ook in die Verenigde Koninkryk mense inhegtenis geneem, hoewel die National Crime Agency nie bereid was om besonderhede te gee oor die aantal wat inhegtenis geneem is nie. In Swede is 155 mense inhegtenis geneem as deel van die operasie op 7 Junie.

Die bewyse waarop beslag gelê is, het byna 40 ton dwelms ingesluit (meer as 8 ton kokaïen, 22 ton dagga en daggahars, 6 ton sintetiese dwelmvoorgangers, 2 ton sintetiese dwelms), 250 vuurwapens, 55 luukse motors. en meer as $ 48 miljoen in verskillende geldeenhede en kripto-geldeenhede. In Australië alleen is 224 mense op 526 aanklagte inhegtenis geneem. In die loop van die drie jaar was daar in totaal meer as 9 000 polisiebeamptes in 18 lande by die lokvaloperasie betrokke. Die Australiese premier, Scott Morrison, het gesê dat die lokvaloperasie "'n swaar slag teen georganiseerde misdaad geslaan het". Europol het dit beskryf as die "grootste wetstoepassingsaksie ooit teen geïnkripteerde kommunikasie".

•   Hierdie artikel is in sy geheel of gedeeltelik uit die Engelse Wiki vertaal.